Qyzylorda oblysynda 80 myń aýyl turǵyny skrınıngtik tekserýden ótti
QYZYLORDA. QazAqparat - Qyzylorda oblysynda toǵyz aıda aýylda turatyn 80 myńnan astam adam skrınıngtik tekserýden ótti, dep habarlaıdy QazAqparat tilshisi.
Qyzylorda oblysynda bıyl jyljymaly medıtsınalyq keshender shalǵaıdaǵy eldi mekenderdi aralap, turǵyndar densaýlyǵyn tekserýde. Nátıjesinde toǵyz aıda aýylda turatyn 80 myńnan astam adam skrınıngilik tekserýden ótti.
Bilikti dárigerler bastaǵan kósh bul joly Jalaǵash aýdanyndaǵy Aqsý aýylyna boldy. Jyljymaly medıtsınalyq keshender zamanaýı medıtsınalyq qurylǵylarmen jabdyqtalǵan. Onda tolyqqandy dıagnostıkalyq tekserýden ótýge múmkindik bar.
Aqsý aýylynyń turǵyndary dárigerlerge tekserilýge kóbirek jınaldy. Eldi mekende túrli sozylmaly aýrýǵa shaldyqqan 328 adam dıspanserlik esepte tur.
Densaýlyq saqshylary halyqqa tıisti keńes berdi. Keıbirine em alý úshin medıtsına mekemelerine joldama usynyldy. Bul bastama mindetti áleýmettik-medıtsınalyq saqtandyrý qorynyń esebinen júrgizilýde.
«Biraz jyldan beri qan qysymym joǵary, júrek syrqatymen esepte turamyz. Aýyrǵanyma 25-30 jyldaı boldy. Bizdiń aýylǵa kelip jatqan mamandarǵa raqmet. Jaqsy qarap, kóńil bólip jatyr. Tehnıkasy zamanaýı. Biz aýdanǵa barǵansha, bizdi osylaı tekserip tursa, jaqsy edi», - deıdi aýyl turǵyny Dosmurat Qojaǵulov.
