Qyzylorda oblysynda 71 júrgizýshi rýlge mas kúıde otyrǵan
Óńirde sońǵy eki kúnde barlyǵy 800-ge jýyq quqyq buzýshylyq anyqtaldy. Qaýipsizdik beldigin taqpaǵan, jalǵan memlekettik belgi taqqan júrgizýshiler jaýapqa tartylyp jatyr. Jalpy jyl basynan ishimdik iship, kólik basqarǵan 71 júrgizýshi tirkeldi.
«4 aqpanda tańǵy saǵat 06:30 shamasynda polıtsııa qyzmetkerleri qala aýmaǵynda «Volkswagen Passat» markaly avtokóligin toqtatty. Tekserý barysynda júrgizýshiniń kólik quralyn alkogoldik masań kúıde basqarǵandyǵy jáne aǵymdaǵy jyldyń 30 qańtarynda sot sheshimimen kólik quralyn basqarý quqyǵynan aıyrylǵandyǵy anyqtaldy. Tártip buzǵan júrgizýshi Qyzylorda qalalyq Polıtsııa basqarmasynyń ýaqytsha ustaý abaqtysyna qamaqqa alyndy. Oǵan qatysty Qazaqstan Respýblıkasy Qylmystyq kodeksiniń 346-babynyń 1-bóligimen, ıaǵnı kólik quralyn basqarý quqyǵynan aıyrylǵan, alkogoldik masań kúıdegi adamnyń kólik quralyn basqarýy deregi boıynsha sotqa deıingi tergep-tekserý bastaldy», - dep málim etti Qyzylorda oblystyq Polıtsııa departamentiniń baspasóz qyzmetinen.