Qyzylorda oblysynda 6 sý qoımasy salynady
QYZYLORDA. QazAqparat - Qyzylorda oblysynda aldaǵy ýaqytta 6 sý qoımasy salý josparlanyp otyr, dep habarlaıdy QazAqparat tilshisi.
Atalmysh sý qoımalary agroónerkásiptik keshenin damytýdyń memlekettik baǵdarlamasy sheńberinde qolǵa alynady. Onda 3 mlrd tekshe metr tasqyn sý jınalady.
«Olardyń ishinde eń aýqymdysy retinde 1,5 mlrd tekshe metr sý jınaıtyn Qaraózek jáne 600 mln tekshe metr sý jınaıtyn Kúmisketken sý qoımalaryn aıtýǵa bolady. Jyl saıyn Úlken Aral teńizine qaıtarymsyz ketetin 3-4 mlrd.tekshe metr sýdy Kúmisketken jáne Qaraózek sý qoımalaryna jınaýǵa ábden bolady. Sol arqyly egistikti sýmen qamtamasyz etýge, mal jáne balyq sharýashylyǵyn damytýǵa jaǵdaı jasalady», - dedi Qyzylorda oblystyq tabıǵı resýrstar men tabıǵat paıdalanýdy retteý basqarmasy basshysynyń orynbasary Baýyrjan Shámenov.
Buǵan deıin Qyzylordada «Kúmisketken» sý qoımasy salý josparlanyp otyrǵanyn habarlaǵan bolatynbyz.
