Qyzylorda oblysynda 58 mektep jańa mehanızm boıynsha qarjylandyrý júıesine ótedi

QYZYLORDA. QazAqparat - Búgin oblys ákimi Gúlshara Ábdiqalyqova jańa oqý jylyna daıyndyq barysyn pysyqtaý úshin oblystyq bilim basqarmasynyń basshysy Aqzıra Qasymovany qabyldady, dep habarlaıdy QazAqparat Qyzylorda oblysy ákiminiń baspasóz qyzmetine silteme jasap.

Oblys ákimine sala basshysy jańa oqý jylyn qashyqtan uıymdastyrý, bilim berý uıymdarynyń daıyndyǵy men mektepterde júrip jatqan jóndeý jumystary týraly baıandady.

Jańa oqý jylynda óńirde 293 mektepte 169 143 oqýshy bilim alsa, 18 423 bala 1-synypqa qabyldanady dep josparlanýda.

Bıyl mektepter jan basyna qarjylandyrýǵa kóshedi. Aral aýdanynan 9 mektep, Qazaly aýdanynan 3 mektep, Baıqońyr qalasynan 5 mektep, Qyzylorda qalasyndaǵy 41 mektep jańa mehanızm boıynsha qarjylandyrý júıesine ótedi.

Qabyldaýda Aqzıra Qasymova jańa oqý jylyn qashyqtan uıymdastyrýǵa qajetti sharalardyń, onyń ishinde balalarǵa mektep balansyndaǵy kompıýterlerdi berý, demeýshiler esebinen usynylatyn noýtbýk pen planshetterdi tabystaý jumystary bastalyp ketkenin atap ótti.

Jańa oqý jylynyń І toqsanynda 222 mekteptegi 116 888 oqýshy qashyqtan oqıtyn bolyp sheshildi. Bul oqýshylar BilimLand, Daryn-onlaın ınternet platformalary arqyly sabaqty bastaıdy. Al, 1-4 synyptaǵy 41 547 oqýshy dástúrli bilim almaq. Munan bólek, shalǵaı ornalasqan eldi-mekendegi 71 mektepten 10712 oqýshy dástúrli tártippen oqytylady. Bul rette bilim berý uıymdarynda qatań sanıtarlyq talaptar saqtalady.

Oblys ákimi Gúlshara Ábdiqalyqova balalarǵa mektep tarapynan beriletin elektrondy qurylǵylardy tabystaýda respýblıkalyq bıýdjet qarajatyna alynatyn kompıýterlerdiń satyp alý jumystarynyń arnaıy talaptaryn ata-analarǵa durys túsindirý qajettigin atap ótti.

Qabyldaý barysynda sala basshysy elektrondy qurylǵysy joq 9687 oqýshyǵa elektrondy qurylǵylar berý jumystary júrgizilip, 25 tamyzǵa deıin aıaqtalatynyn aıtty. Al, demeýshiler esebinen oqýshylarǵa 239 planshet, 15 noýtbýk berilgen. Sonymen birge, respýblıkalyq bıýdjetten bólinetin qarjyǵa 22870 kompıýter, planshetterdi satyp alý jumystary bastalatynyn baıandady. Munan bólek saladaǵy únemdelgen bıýdjet esebinen 176,7 mln. teńgege 2635 planshet alýǵa jumystary júrgizilýde.

Oblys ákimi oqýshylardyń oqýlyqpen qamtylý jaǵdaıyn surady. Óz kezeginde Aqzıra Qasymova 2020 jyly oqýlyqtar satyp alýǵa barlyǵy jergilikti bıýdjetten 1,2 mlrd. teńge qaralǵanyn atap ótip, baspalardan oqýlyqtardyń 89 paıyzy alynǵanyn jáne 25 tamyzǵa deıin mektepterge tolyq jetkiziletinin habarlady.

Qabyldaý sońynda aımaq basshysy Gúlshara Ábdiqalyqova basqarma basshysyna jańa oqý jylyna deıin mektepterdegi jóndeý jumystaryn sapaly aıaqtaýdy jáne qashyqtan oqytý barysyn júıeli uıymdastyrýdy tapsyrdy.