Qyzylorda oblysynda 500 myń tonnadan astam kúrish jınaldy
QYZYLORDA. QazAqparat - Bıyl Qyzylorda oblysynda 87,3 myń gektarǵa kúrish egildi, aq dánni ortasha ónimdiligi gektaryna 54,5 tsentnerdi qurady, dep habarlaıdy QazAqparat.
Qyzylorda oblys ákimi baspasóz qyzmetiniń málimetinshe, joǵary ónimdi sorttardy paıdalaný esebinen sońǵy 5 jylda kúrish jarmasynyń óndirisi 39 paıyzǵa artqan. Osy jyldary kúrishtiń jalpy túsimi 2 esege artty.
Jalaǵash aýdanynda elevator bazasyndaǵy «Baıqońyr» agroholdıngin qurý aımaqta kúrish klasterin damytýǵa yqpal etti.
Aıta keteıik, Y.Jaqaev atyndaǵy kúrish óndirý ǵylymı-zertteý ınstıtýty Búkilreseılik kúrish ınstıtýtymen birlesip Qyzylorda oblysy úshin arnaıy sorttardy shyǵaryp keledi.
2017 jyly oblystaǵy kúrish sharýashylyqtarynda Iranda suranysqa ıe «Torem Hoshemı» sorty ósirile bastady. Osyǵan oraı, qarmaqshylyq «Aqtóbe jáne K» JShS osy sortty 70 gektar jerge ekti, al Qazalynyń «Syr marjany» sharýashylyǵy synaqtan ótkizý úshin 1 gektar aýmaqqa ekken edi.
Atap ótý kerek, 2020 jylǵa qaraı oblysta Iran kúrishiniń egistik alqaby 5 myń gektarǵa deıin ulǵaıtylady, sonymen qatar, óńdelgen kúrish eksportynyń kólemin 8 myń tonnaǵa deıin jetkizý josparlanyp otyr.
Sonymen qatar, Syr óńiriniń kúrishi Túrkimenstan, Tájikstan, Qyrǵyzstan, Reseı, Belarýs, Armenııa, Ázerbaıjan, Mońǵolııa, Aýǵanstan jáne t. b. elderge eksporttalatyn bolady.
Qyzylordada egin jınaý naýqanynyń aıaqtalýyna oraı uıymdastyrylǵan «Altyn dán» merekesi aıasynda aýylsharýashylyǵy jármeńkeleri, mádenı-buqaralyq is-sharalar uıymdastyryldy. Sondaı-aq aımaqtaǵy aýylsharýashylyq salasynyń ardagerleri men úzdik qyzmetkerlerin marapattaý rásimi ótkizildi.
