Qyzylorda oblysynda 5 jedel járdem toby ashylady
Bıyl shaqyrýlardy der kezinde oryndaý maqsatynda Qyzylorda qalasy boıynsha qosymsha 2 top ashyldy. Al 2020 jyly qosymsha 5 jedel járdem tobyn ashý josparlanǵan.
«Oblys boıynsha barlyǵy 77 jedel járdem toby jumys atqarýda. Qazirgi tańda jedel járdem qyzmetine túsken aryz-shaǵymdardyń sany ótken jylmen salystyrǵanda 30,8 paıyzǵa tómendegen. Bıyl103 jelisine 43 myńnan astam qońyraý túsken. Júrgizilgen is-sharalar nátıjesinde shaqyrtýlarǵa keshigip shyǵý kórsetkishi merzimdi ýaqytta 5,3 paıyzǵa azaıǵan», - dedi oblystyq medıtsınalyq jedel járdem stansasynyń bas dárigeri Almat Qurmanǵalı.
Jedel járdem stansasy materıaldyq-tehnıkalyq jaǵdaıyn jaqsartý úshin bıylǵy jyldyń qazan aıynda 7 reanımobılge ıe boldy. Jyldyń aıaǵyna deıin respýblıkalyq bıýdjetten 19 jabdyqtalǵan sanıtarly avtokóliktiń kelýi josparlanǵan.
Bas dárigerdiń aıtýynsha, endi aımaqtyń kez kelgen jerinde turyp, 103 nómirine telefon soqqan jaǵdaıda, qońyraý birden ortalyqqa túsedi. Eldi mekenderden túsken 1-3 sanattaǵy shaqyrý sol aýmaqqa jaqyn ornalasqan brıgadalarǵa júktelip, jyldam jóneltiledi.