Qyzylorda oblysynda 482 934 adam saılaýshylar tizimine engizildi

QYZYLORDA. QazAqparat – Qyzylorda oblysynda 482 934 adam saılaýshylar tizimine engizildi. Bul týraly óńirde QR Ortalyq saılaý komıssııasynyń hatshysy Muhtar Ermannyń qatysýymen ótken kóshpeli semınar-keńeste aıtyldy, dep habarlaıdy QazAqparat OSK saıtyna silteme jasap.

Qyzylorda oblysy ákimdigi apparatynyń basshysy Sh. Baımanov oblysta komıssııanyń 2 710 múshesi jumys isteıtinin habarlady.

Aıtýynsha, oblys boıynsha saılaýshylar tizimine engizilgen saılaýshylardyń jalpy sany – 482 934 adam. 30 qazanynda saılaýshylardyń tizimderi saılaý ýchaskelerine berildi, 4 qarashadan bastap tizimder azamattarǵa tanysýǵa usynyldy.

Óz saılaý ýchaskesin naqtylaý maqsatynda azamattar Call-ortalyqqa qońyraý shalyp, saılaýshylar tiziminde ózderin tekserý jónindegi saylau.orda.gov.kz servısti paıdalaný múmkindigine ıe. Sondaı-aq, Telegram-bot (sailau_kzoBot) jáne «Smart Qyzylorda» mobıldi qosymshasy arqyly saılaýshylar tizimin tekserý múmkindigi qarastyrylǵan. Búgingi tańda 12 myńnan astam suranys tústi.

Halyqty saılaý týraly keńinen aqparattandyrý maqsatynda óńirlik teledıdarda beınerolıkter, oblys aýmaǵynda bannerler ornalastyryldy, jergilikti buqaralyq aqparat quraldarynda jáne áleýmettik jelilerde aqparattyq materıaldar jarııalandy.

Oblystyq saılaý komıssııasy barlyq aýdandarda jáne Qyzylorda qalasynda komıssııanyń 800 múshesi úshin oqytý kýrstaryn uıymdastyrǵan.

Búgingi tańda óńirde 31 myńnan astam múgedek adam tirkelgen, olardyń 20 071-i saılaýǵa qatysýǵa quqyly. Barlyq saılaý ýchaskelerinde múgedektigi bar adamdardyń kirip-shyǵýy úshin jaǵdaılar jasalǵan. Aýdandarda jáne Qyzylorda qalasynda qurylǵan monıtorıngtik top obektilerdiń tolyq beıimdelýin zerdeleý boıynsha turaqty jumys júrgizilip jatyr. Sonymen qatar, saılaý kezinde múgedektigi bar adamdardy tasymaldaý úshin 32 ınvataksı qyzmeti jumys isteıdi.