Qyzylorda oblysynda 45 myńnan astam kópbalaly ana bar
QYZYLORDA. QazAqparat - Otbasylyq qundylyqtar men otbasylyq-demografııalyq saıasatty nasıhattaýǵa arnalǵan Qyzylorda oblystyq assambleıa hatshylyǵynyń is-sharalar josparyna sáıkes jýyrda «Batyr Ana» qoǵamdyq birlestiginiń uıymdastyrýymen dóńgelek ústel otyrysy bolyp ótti. Bul týraly oblystyq ákimdiktiń baspasóz qyzmetinen habarlady.
Búgingi tańda Qyzylorda oblysynda 45 myńnan astam kópbalaly analar bolsa, olardyń 8 myńǵa jýyǵy «Batyr Ana» qoǵamdyq birlestiginiń quramyna tirkelgen.
Oblys ákimi Q.Kósherbaevtyń qoldaýymen 2013-2014 jyldar aralyǵynda «Batyr Ana» qoǵamdyq birlestiginiń 700-ge jýyq analary respýblıkanyń túrli emdeý-saýyqtyrý oryndaryna tegin joldamalar alyp, emdelip keldi.
Oblystyń qoǵamdyq-saıası ómirine «Batyr Ana» qoǵamdyq birlestigi belsendi aralasady. Atalǵan birlestiktiń kóptegen isteriniń biri - 2011 jyly «Shańyraq» kópbalaly analar klýbynyń qurylýy.
«Shańyraq» kópbalaly analar klýbynyń dóńgelek ústeli barysynda qoǵamdaǵy jáne otbasyndaǵy áıel-ananyń orny men urpaq tárbıeleýdegi róli talqylandy.
Uıymdastyrylǵan sharaǵa «Qoǵamdyq kelisim ortalyǵynyń» dırektory Rahıma Ahmetova, Tasbóget kentiniń ákimi Jumabek Alıev, «Igilik» korporatıvtik qorynyń dırektory Aqtolqyn Sherehan, eki dúrkin Olımpıada chempıony Ilıa Ilınniń anasy Galına Ilına qatysyp, sóz sóıledi.
Sharaǵa qatysýshylar ata-ananyń bala tárbıesindegi orny týraly tanymdyq-tájirıbe almasyp, jas jetkinshekterdiń tulǵalyq bolmysyn otansúıer azamat retinde qalyptastyrýǵa baǵyttalǵan utymdy pikirlerimen bólisti.
