Qyzylorda oblysynda 44 bala jol apattarynda zardap shekti
QYZYLORDA. QazAqparat- Qyzylorda qalasynda balalar tasymalymen aınalysatyn avtokólikterdiń qatysýmen oryn alatyn jol apattarynyń aldyn alý, bala travmatızmin boldyrmaý máseleleri kóterildi, dep habarlady QazAqparat tilshisi
Qyzylorda oblystyq Іshki ister departamenti uıymdastyrǵan jıynǵa Qyzylorda qalasy ákiminiń orynbasary Shahmardan Baımanov, oblystyq bilim basqarmasynyń basshysy Baqytjan Saılybaev, qalalyq bilim bólimi basshysynyń orynbasary Móldir Táýipbaeva, «Mektepke deıingi balalar uıymdarynyń Qazaqstan qaýymdastyǵy» jeke kásipkerler men zańdy tulǵalar birlestiginiń Qyzylorda oblysy boıynsha fılıal dırektory N.Mıshýkova jáne mektepke deıingi bilim berý uıymdarynyń meńgerýshileri qatysty.
Statıstıkaǵa súıensek, jyl basynan beri oblys kóleminde 194 jol-kólik oqıǵasy oryn alsa, onyń 25,8 paıyzy, ıaǵnı 50 deregi balalardyń qatysýymen bolǵan. Atalǵan jol apattary kezinde 44 bala túrli dárejedegi dene jaraqattaryn aldy. Al qańtar aıynan beri balalar tasymalymen aınalysatyn balabaqsha avtokólikteriniń qatysýymen 2 jol-kólik oqıǵasy oryn alǵan - biri Tasbóget kentinde, ekinshisi Jeltoqsan-Tolybekov kósheleriniń qıylysynda.
Іshki ister departamenti qyzmetkerleri balalar tasymalymen aınalysatyn kólik quraldaryna qoıylatyn talapty kúsheıtý qajettigin, balabaqsha basshylyǵy kólik quralyn jalǵa alý kezinde onyń tehnıkalyq kúıi memlekettik standartqa saı bolýyn qadaǵalaý qajettigin basa kórsetti. Balalar tasymalymen aınalysatyn avtokóliktiń keminde eki esigi bolýyn jáne kóliktiń aldyńǵy jáne artqy jaǵynda «Balalar tasymaly» degen arnaıy tańbasy ornalasýy kerektigi eskertildi. Budan bólek, júrgizýshi retinde jumysqa alynatyn azamattardyń jas shamasyna (25-ten asqan), jumys ótili (5 jyldan kem emes) men tájirıbesine qoıylatyn talapty kúsheıtý máselesi kóterildi.
