Qyzylorda oblysynda 4-synyp oqýshysy kóz jumdy
QYZYLORDA. QazAqparat - Qyzylordada balalar aýrýhanasynda júrek jáne ókpe jumysynyń jetkiliksizdigi saldarynan 11 jasar bala kóz jumdy, dep habarlaıdy QazAqparat tilshisi.
Oqıǵa 24 qańtar kúni boldy.
«Qaıtys bolǵan oqýshy 2010 jyly dúnıege kelgen. Alǵashqyda denesinde bórtpe paıda bolyp, sonyń saldarynan aýyrǵan. Bastapqyda úı jaǵdaıynda em alǵan, dárigerge kóringennen keıin ınfektsııalyq aýrýhanaǵa jatqyzyldy. Koronavırýsqa qatysty synama alyndy. Nátıjesi teris boldy. Sondyqtan 19 qańtarda kópbeıindi balalar aýrýhanasyna aýystyryldy. Respýblıkanyń bilikti mamandarynan keńes alyndy. Ókinishke qaraı, bala 24 qańtar kúni qaıtys boldy. Oǵan júrek, ókpe jumysynyń jetkiliksizdigi negizgi sebep bolyp otyr. Qosymsha komıssııa quryldy. Bul baǵytta tıisti jumystar atqarylatyn bolady», - dedi oblystyq Densaýlyq saqtaý basqarmasynyń basshysy Sábıt Pazylov.
Bala Qyzylorda qalasyndaǵy P.Osıpenko atyndaǵy №8 mekteptiń 4-synybynda oqyǵan. Ol bıylǵy oqý jylynyń alǵashqy toqsanynan bastap onlaın formatta qashyqtan bilim alǵan.
«Oqýshynyń oqý úlgerimine qatysty eshqandaı problema bolǵan emes. Qashyqtan oqytýǵa baılanysty bala elektrondy jabdyqtarmen qamtylǵan. Ustazdary tarapynan balamen keri baılanys jumysy júrgizilgen», - dedi oblystyq Bilim basqarmasynyń basshysy Aqzıra Qasymova.
Aıta keteıik, qazirgi tańda oblys boıynsha 89 258 oqýshy (53%) qashyqtan, 80 636 oqýshy (47%) dástúrli bilim alýda.
Sondaı-aq, Qyzylorda oblysynyń emdeý oryndarynda koronavırýspen kúreste nátıjeli jumystar atqaryldy.
