Qyzylorda oblysynda 28 jastaǵy jigit koronavırýs juqtyrǵan
Búgin, 1 sáýirde kúni jergilikti ýaqytpen saǵat 16.15-te Qyzylorda oblysynda COVID-19 vırýsynyń jańadan 1 jaǵdaıy tirkeldi. Bul týraly Óńirlik kommýnıkatsııalar qyzmeti alańynda oblystyq densaýlyq saqtaý basqarmasy basshysy Jaqsylyq Abdýsametov habarlady.
«Qazirgi ýaqytta, oblys boıynsha 25 naýqas tirkeldi. Jańadan tirkelgen 1 naýqas Jańaqorǵan aýdanynan. Ol 28 jastaǵy er adam. Naýqas karantınde bolǵan. Ol osy aýdanda aldynda anyqtalǵan naýqaspen tyǵyz qarym-qatynasta bolǵandyqtan oqshaýlanǵan edi. Onyń jaǵdaıy qanaǵattanarlyq», - dedi basqarma basshysy.
Aıta keteıik, oblysymyzda qarym-qatynasta bolǵan 485 adam anyqtaldy. Onyń 133 karantınde bolsa, 352 -si úı jaǵdaıynda oqshaýlanǵan.
Eske sala keteıik, 1 sáýirden bastap Qyzylorda qalasynda shekteý sharalary engizilip, karantın jarııalandy.