Qyzylorda oblysynda 28 blokpost alyndy

QYZYLORDA. QazAqparat - Qyzylorda oblysynda tótenshe jaǵdaı rejımi kezinde qoıylǵan 28 blokbeket jumysyn toqtatty, dep habarlaıdy QazAqparat tilshisi.

Tótenshe jaǵdaı rejımi kezinde óńirde komendanttyq saǵat pen birqatar shekteýler engizilgen bolatyn.

Kezekshilik jasaqtar kúsheıtilip, qarýlanǵan polıtsııa qyzmetkerleri men áskerıler táýlik boıy qyzmet atqarǵan 28 blokbeket qoıyldy.

Atalǵan ýaqytta polıtsııaǵa 952 azamat jetkizildi. Tótenshe jaǵdaı rejımin buzǵan 414 tulǵa ákimshilik jaýapkershilikke tartyldy, 253 quqyq buzýshy ákimshilik qamaýǵa alynyp, olardyń 73-i bosatyldy.

«Qylmysqa kúdikti retinde tanylǵan 97 adam ýaqytsha ustaý abaqtysyna qamaqqa alynsa, 12 kúdiktige qatysty qamaýǵa alýǵa baılanysty emes bultartpaý sharasy tańdaldy.

Ustalǵandardan 1 danadan tegis uńǵyly jáne travmatıkalyq qarý, 13 dana pyshaq, 9 qalqan, 4 kaska, 6 dýlyǵa, 1 bronejılet jáne 1 keli 150 gramm esirtki zattary alyndy. Medıtsınalyq mekemelerge 50 polıtsııa qyzmetkeri júginip, olardyń 3-ýi jatqyzyldy», - dep málim etti Qyzylorda oblystyq Polıtsııa departamentinen.

Vedomstvo málimetinshe, qazir barlyq memlekettik mekeme, tirshilikti qamtamasyz etý nysandary, ekinshi deńgeıdegi bankter, temirjol vokzaly jáne aeroport shtattyq rejımde jumys jasaýda.

Eske salsaq, Qyzylordada jappaı ereýil kezinde talqandalǵan ǵımarattardyń basym bóligi 20 aqpanǵa deıin qalpyna keledi.