Qyzylorda oblysynda 239 adam zańsyz esirtki bıznesimen aınalysqan
QYZYLORDA. QazAqparat - Búgin Óńirlik kommýnıkatsııalar qyzmetinde Qyzylorda oblysy sot salasynyń 2016 jyly atqarylǵan jumystary boıynsha baspasóz konferentsııasy ótkizildi, - dep habarlady QazAqparat HAA tilshisi.
Brıfıng barysynda oblystyq sottyń qylmystyq ister boıynsha alqa tóraǵasy Baqytjan Qalymbet salada atqarylǵan jumystarǵa toqtaldy.
Alqa tóraǵasynyń aqparatyna sáıkes, 2016 jyldyń 12 aıynda jergilikti sottarǵa 1727 qylmystyq is túsip, ótken jyldan qalǵan isterdiń sany 86-ny qurady. Osy aralyqta 726 adamǵa qatysty 617 is óndiristen qysqartyldy. Esepti kezeńde kináni moıyndaý tártibi protsestik kelisimmen 68 qylmystyq is qaralyp, teris qylyq jasaǵan 325 adamǵa jaza qoldanylǵan.
Sybaılas jemqorlyqqa baılanysty 2016 jyldyń 12 aıynda aýdandyq jáne oǵan teńestirilgen sottarda 39 adamǵa qatysty 35 is, esirtkiniń zańsyz aınalymyna baılanysty 239 adamǵa qatysty 213 is qaralǵan.
Medıatsııa tártibimen 335 qylmystyq jáne 485 azamattyq, 86 ákimshilik is, partısıpatıvtik rásim qoldanylyp, 14 azamattyq is qaralǵan.
Sondaı-aq, brıfıng sońynda oblystyq sottyń baspasóz qyzmetin úılestirýshi sýdıasy Artýr Narımov aldaǵy ýaqytta jýrnalıster arasynda uıymdastyrylatyn «Sot reporteri» baıqaýynyń talaptaryn túsindirdi.
