Qyzylorda oblysynda 23 ınnovatsııalyq joba júzege asyrylady

QYZYLORDA. QazAqparat - Qyzylordada ındýstrııalandyrý baǵdarlamasynyń ekinshi besjyldyǵy aıasynda quny 604 mlrd teńgeniń 23 jobasyn júzege asyrý josparlanyp otyr. Bul óz kezeginde 6,2 myń jumys ornyn qurýǵa múmkindik beredi. Bul týraly Qyzylorda oblysynyń ákimi Qyrymbek Kósherbaev ındýstrıaldyq-ınnovatsııalyq damý strategııasy jónindegi respýblıkalyq konferentsııada málim etti.

«Búginde biz osy baǵdarlama aıasynda birqatar iri ındýstrıaldyq-ınnovatsııalyq jobalardy iske asyrýdamyz. Qazir qurylysy júrgizilip jatqan (amerıkalyq ınvestormen birge) shyny zaýyty jabdyqtarynyń 50% jetkizildi. Kásiporyndy keste boıynsha 2017 jyldyń birinshi jartyjyldyǵynda iske qosýdy josparlap otyrmyz. Jabdyqtardyń barlyǵy derlik AQSh pen Eýropadan jetkizilýde. «Bala-Saýysqandyq» vanadıı ken ornynda tájirıbelik-óndiristik zertteý jumystary aıaqtaldy. Ammonıdiń metavanadatynyń alǵashqy bóligi synaqtan ótkizý úshin AQSh, Taıvan men Reseıge jóneltildi. Jobanyń ekinshi jáne úshinshi kezeńderin qarjylandyrý úshin 2016 jyldyń qarasha aıynda London qalasynda Qazaq-Brıtan úkimetaralyq komıssııasynyń úshinshi otyrysy aıasynda ınvestıtsııalyq kelisim shartqa qol qoıylady dep kútilýde», - dep habarlady oblys ákimi.
Sonymen qatar, «Shalqııa» qorǵasyn-myrysh ken ornynda taý-ken baıytý kombınaty jáne qýaty 80 mVt bolatyn gaz týrbınalyq elektr stansasy qurylystarynyń daıyndyq jumystary bastaldy. Óńdeý zaýyty men salý úshin daıyndyq jumystary bastaldy. Ferroqorytpa zaýytynyń qurylysyn salý jumystary da jalǵasýda.

Bıyl 23 tamyzda Varshava qalasynda polıak kompanııasymen ferroqorytpa zaýytynyń jobasyn iske asyrý boıynsha yntymaqtastyq týraly kelisimge qol qoıylǵan bolatyn. Polshanyń Ulttyq banki jobany 300 mln AQSh dollary kóleminde qarjylandyrýǵa daıyn ekendikterin rastady.

Mundaı aýqymdy ınnovatsııalyq óndiris oryndaryn salý oblysqa shıkizatqa táýeldilikten arylýǵa jáne ekonomıkany ártaraptandyrýǵa múmkindik beredi. Munan bólek jańa kásiporyndarda kóptegen jumys oryndary ashylady. Ol óz kezeginde turǵyndardyń áleýmettik ahýalyna oń áser etetin bolady.