Qyzylorda oblysynda 2 sport kesheni ashyldy
QYZYLORDA. QazAqparat - Memlekettik-jekemenshik áriptestik aıasynda Jańaqorǵan aýdanynyń Súttiqudyq aýyldyq okrýginde jáne Shıeli aýdanynyń Gıgant aýylynda jańa sporttyq-saýyqtyrý keshenderi salyndy, dep habarlaıdy óńir basshysynyń baspasóz qyzmeti.
Jańaqorǵan aýdanynda 150 oryndyq sporttyq-saýyqtyrý kesheniniń ashylý rásimi ótti.
Jańa sport kesheninde 13 adam jumyspen qamtamasyz etildi. Munda erkin kúres pen áıelder kúresi, toǵyzqumalaq, boks, gandboldan jattyǵýlar ótkiziledi.
Sondaı-aq Shıeli aýdany Gıgant aýyldyq okrýginde "Bastaý" jastar saýyqtyrý kesheni paıdalanýǵa berildi.
"Deni saý urpaq - el bolashaǵynyń kepili. Elbasymyzdyń dástúrli Joldaýlarynda buqaralyq sportqa, salaýatty ómir saltyn qalyptastyrýǵa basymdyq berilip keledi. Bul kún barsha sportsúıer qaýym úshin, onyń ishinde jastar úshin eń qýanyshty kúnniń biri dep esepteımin. Óıtkeni, aýdanda alǵash ret jabyq júzý basseıni ashylýda», - dedi oblys basshysy Qyrymbek Kósherbaev nysannyń ashylý rásiminde.
Aıta keteıik, eki jyl ishinde óńirde 16 sport ǵımaraty iske qosyldy, onyń 9-y MJÁ boıynsha jáne 7-i oblystyq bıýdjet esebinen salyndy.
Búginde Qyzylorda oblysynda memlekettik-jekemenshik áriptestik aıasynda quny 34 mlrd teńge bolatyn 75 joba júzege asyrylýda. Olar - densaýlyq saqtaý, sport, bilim berý, tsıfrlandyrý jáne turǵynúı kommýnaldyq keshenin jańǵyrtý salasyndaǵy jobalar.
