Qyzylorda oblysynda 2 aptalyq karantınge baılanysty jańa shekteýler kúshine enedi
Bul shara oblysta indettiń aldyn alý jáne taralýyna jol bermeý maqsatynda qolǵa alynyp otyr. Osy maqsatta Qyzylorda oblysynyń bas memlekettik sanıtar dárigeriniń qaýlysy jaryq kórdi.
«Búginde oblysta koronavırýs ınfektsııasyn juqtyrǵandar sany 1379 adamǵa jetti. Sondyqtan indettiń odan ári taraýyn shekteý úshin sanıtarlyq-epıdemologııalyq sharalar kúsheıtildi. Shekteýge túsinistikpen qaraýdy, ony qatań saqtap, koronavırýs ınfektsııasynyń taralýyna jol bermeý úshin qabyldanǵanyn túsinýlerińizdi suraımyn. Bul sharalardyń tıimdiligi árqaısymyzdyń is-áreketimizge baılanysty bolady. Eń aldymen óz densaýlyǵyńyzǵa jáne aınalańyzdaǵy adamdardyń haline jaýapkershilikpen qaraý kerek», - deıdi oblys ákiminiń orynbasary Naýryzbaı Baıqadamov.
Qyzylorda oblysynyń taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary - oblystyń bas memlekettik sanıtar dárigeri Álııa Ábdiqaıymova qaýly búgin saǵat 00:00-den bastap kúshine enetinin aıtyp ótti. Onyń qatarynda birneshe shekteý jáne karantındik sharalarǵa ózgeris engizildi.
«Atap aıtqanda, otbasylyq is-sharalardy ótkizýge, spa-salondardyń, sulýlyq salondarynyń, shashtaraz, kosmetıkalyq jáne kosmetologııalyq qyzmet kórsetetin ortalyqtar men salondardyń qyzmetine, teatrlar, kontsert zaldary, murajaılar, kórmeler jáne ózge de mádenıet obektileriniń qyzmetine tyıym salynady. Sondaı-aq, menshik nysanyna qaramastan bilim jáne mektepke deıingi balalar mekemeleriniń (balabaqshalar, jazǵy tynýǵý lagerleri, korrektsııa jáne bilim berý ortalyqtary, úırmeler, qosymsha bilim berý ortalyqtary (repetıtorlyq, tildik) qyzmet kórsetý salasy obektileriniń qyzmeti toqtatylady. Oǵan qosa dinı obektilerdiń, túngi, kompıýterlik, ınternet jáne bılıard klýbtarynyń, býkmekerlik jáne loto-motokontorlardyń, fıtnes, trenajer zaldary (ortalyqtary), sporttyq komplekster (úıirmeler, sektsııalar t.b.), qoǵamdyq monsha, saýna, akvaparkterter, basseınder, jaǵajaılardyń, saýda-oıyn-saýyq ortalyqtary, saýda-oıyn-saýyq keshenderi janyndaǵy balalardyń oıyn alańdaryn, fýtkordtar, kınoteatrlar, jármeńkelerdiń, azyq-túlik jáne azyq-túlik emes jabyq bazarlarynyń, avtomobıl, qurylys, kıim-keshek, mal bazarlary men adamdar kóp jınalatyn basqa da obektilerdiń jumysy toqtatylady. Al respýblıkanyń óńirleri men qala/aýdandar arasyndaǵy jolaýshylar avtobýs qatynasyn ýaqytsha toqtap, qoǵamdyq kóliktiń jumysy demalys jáne mereke kúnderi toqtatylady», - dedi Álııa Ábdiqaıymova.
Budan buryn Gúlshara Ábdiqalyqova Qyzylorda oblysy turǵyndaryna úndeý joldaǵany habarlandy.