Qyzylorda oblysynda 2 adamnan Kongo-qyrym qandy bezgegi anyqtaldy
QYZYLORDA. QazAqparat - Qyzylorda oblysynda eki adamnan Kongo-qyrym qandy bezgegi anyqtaldy, dep habarlaıdy QazAqparat tilshisi.
Qazirgi tańda naýqastardyń jaǵdaıy birqalypty. Olar juqpaly aýrýlar bóliminde em alýda. Eki derek te Shıeli aýdanynda tirkelgen.
Jalpy, kenelerdiń taralýyna baılanysty oblysta 113 eldi meken qolaısyz dep tanyldy. Bul aımaqtardy zalalsyzdandyrýǵa bıýdjetten qarjy qarastyrylǵan.
«Memlekettik satyp alý konkýrsynyń nátıjesinde zalalsyzdandyrý jumystaryn júrgizýge merdigerler belgilendi. Mamandar 567 myńnan astam mal jáne 33385 qora, sýattarǵa kóktemgi jáne kúzgi zalalsyzdandyrý sharalaryn atqarady. Qazirgi tańda Shıeli, Jańaqorǵan aýdandarynda atalǵan jumystyń alǵashqy kezeńi aıaqtalyp, kelesi kezeń júrgizilýde. Jalaǵash pen Syrdarııa aýdandarynda birinshi kezeń jalǵasýda. Zalalsyzdandyrý jumystaryna dızıtsıp eritindisi qoldanylýda», - dedi oblystyq jumyldyrý daıyndyǵy basqarma basshysynyń orynbasary Baǵdat Alıev.
Kenelerden zaqymdaný kórsetkishi ótken jyly 1,7 paıyz bolsa, al bıyl 5,4 paıyzdy quraıdy.
«Aıta ketetin jaıt, kene shaqqan jaǵdaıda azamat birden turǵylyqty jerdegi medıtsınalyq pýnktke júginýi tıis. Sol arqyly qajetti em-dom sharalaryn alýyna múmkindigi bar», - dedi oblystyq sanıtarııalyq-epıdemıologııalyq baqylaý departamenti basshysynyń orynbasary Álııa Ábdiqaıymova.
