Qyzylorda oblysynda 17 jastaǵy jasóspirim kólikti basqara almaı jol apatyna túsip, 1 jolaýshy kóz jumdy
Oqıǵa 4 mamyrda saǵat 02.45 shamasynda bolǵan. Qyzylorda oblysynyń Shıeli kentinde turatyn 17 jastaǵy jasóspirim «Toıota» markaly avtokóliginiń basqarý júıesine ıe bola almaı jol-kólik oqıǵasyn jasaǵan.
«Jol apaty saldarynan 1 jolaýshy qóz jumyp, qalǵan úsheýi (júrgizýshimen qosa) jaraqat aldy. Bul derek boıynsha QR Qylmystyq kodeksiniń 345-babynyń 3-bóligimen sotqa deıingi tergep-tekserý áreketteri júrgizilýde. Onda avtomobıldi basqaratyn adamnyń jol júrisi qaǵıdalaryn buzyp, onyń sońy abaısyzda adam ólimine ákep soqqany kórsetilgen. Tıisti sot saraptamalary taǵaıyndaldy», - dep málim etti Qyzylorda oblystyq polıtsııa departamentinen.
Bul jóninde Shıeli aýdandyq bilim bóliminiń basshysy Jibek Baımuratova túsinikteme berdi.
«Kámeletke tolmaǵan balalar kólikti ruqsatsyz úıden tún mezgilinde aıdap shyǵyp, jol apatyna ushyraǵan. Jaraqat alǵan balalar em alýda. Jaǵdaılary birqalypty», - dedi bólim basshysy.
Eske salsaq, budan buryn adam óltirdi degen kúdikpen halyqaralyq izdeýde bolǵan qyzylordalyq ustaldy.
