Qyzylorda oblysynda 16 toıhana qyzmetin ózge salaǵa baǵyttaǵan
QYZYLORDA. QazAqparat – Byltyr bastalǵan pandemııa Qyzylorda oblysyndaǵy kásipkerlik sýbektileriniń 74 paıyzynyń qyzmeti ishinara toqtatty. Atap aıtsaq, azyq-túlik emes taýarlardyń bólshek saýdasy, týrızm salasy, qoǵamdyq tamaqtaný jáne meıramhana, turý jáne jolaýshylardy tasymaldaý qyzmetterinde kásibin júrgizetin shamamen 10 myńǵa jýyq sýbekti zardap shekken, dep habarlaıdy QazAqparat.
«Búgingi kúni toıhana bıznesinen bólek, kásipkerlik sýbektileriniń qyzmetteri tolyǵymen iske qosyldy. Bıznesti jandandyrý baǵytynda 2020 jyly 54 myńǵa jýyq kásipkerge salyqtyq jeńildikter qarastyrylyp, 8,5 myń shaǵyn jáne orta bıznes sýbektisiniń 12 myńnan astam jaldamaly qyzmetkeri mindetti áleýmettik medıtsınalyq saqtandyrý júıesine jarna tóleýden bosatyldy. Memlekettik menshiktegi 356 nysandy jalǵa alyp otyrǵan
194 shaǵyn jáne orta bıznes sýbektisi 60 mln. teńge jaldaý aqysyn tólemeıtin boldy. Sondaı-aq, shaǵyn jáne orta bıznestiń 8 myńǵa jýyq bank aldyndaǵy mindettemeleri boıynsha tólemderi keıinge qaldyryldy. Odan bólek, shaǵyn jáne orta bıznes 2023 jylǵa deıin tabys salyǵynan bosytyldy. Qyzylorda oblysy ákiminiń bekitilgen Jospar aıasynda oblystaǵy 128 toıhananyń qyzmetin ózge salalarǵa qaıta baǵyttaý jumysy qolǵa alynyp, nátıjesinde 16 toıhana saýda dúkenderi men óndiris ornyna aınalǵan», - delingen oblys ákimdiginiń baspasóz qyzmeti taratqan aqparatta.
Budan bólek, memlekettik baǵdarlamalar aıasyndaǵy shamamen 2,8 mlrd. teńge qaıtarymsyz granttar 4770 jumyssyz jáne ózin-ózi jumyspen qamtyǵan azamatqa tabystaldy. Atap aıtsaq, «Bıznestiń jol kartasy 2025» memlekettik baǵdarlamasy aıasynda 78 shaǵyn jáne jas kásipkerdiń jańa bıznes-ıdeıalaryn iske asyrýǵa 181,5 mln. teńge qarjy baǵyttaldy.
«Bızneske jasalynǵan qolaıly jaǵdaılar oblysta shaǵyn jáne orta bıznes salasynyń damýyna, onyń negizgi makroekonomıkalyq kórsetkishteri ósiminiń qaıta qalpyna kelýine ózindik yqpalyn tıgizýde. 2020 jyldyń 1 jeltoqsanynda jumys jasap turǵan kásipkerlik sýbektileriniń sany 2474 birlikke nemese 5,4 paıyzǵa ulǵaıyp, 47897 jetti. 2020 jyldyń І jartyjyldyǵynda shaǵyn jáne orta bızneste jumyspen qamtylǵandar sany 92 470 adamdy qurap, 144 mlrd. teńgeniń ónimi óndirildi. Shaǵyn jáne orta bıznestiń jalpy óńirlik ónimdegi úlesi 13,9 paıyzdy qurap otyr. Bul kórsetkishti 2021 jyly 18 paıyzǵa jetkizý boljamdalýda», delingen baspasóz baıanynda.
