Qyzylorda oblysynda 16 adamnyń ajaly sýdan keldi
QYZYLORDA. QazAqparat - Qyzylorda oblysynda jyl basynan beri sýǵa ketkender sany 16 adamdy qurap otyr. Sýdan qutqarýshylar qyzmeti mamandary 14 adamdy tilsiz jaýdan arashalap qalǵan, dep habarlaıdy QazAqparat tilshisi.
«Sýǵa ketkender arasynda 4 bala bar. Jergilikti turǵyndar qaýipsizdik sharalaryn saqtaı bermeıdi. Sýǵa túsýge belgilenbegen oryndarda shomylady. Sonyń saldarynan tótenshe oqıǵalar oryn alyp jatady», - dedi oblystyq tótenshe jaǵdaılar departamentiniń mamany Aıgúl Nurmanova.
Sýǵa ketý oqıǵalary Qyzylordada basym bolyp otyr. Keleńsiz oqıǵalardyń aldyn alý úshin qala boıynsha bılbordtar ilinip, paraqshalar taratyldy. Degenmen sýǵa ketken azamattar osyndaı qaýipsizdik sharalaryn eskermegendikten qaıǵyly jaǵdaılarǵa urynyp otyr. Atap aıtqanda, 22 shildede Qyzylorda qalasy irgesindegi Shirkeıli kanalynda 1986 jylǵy azamat sýǵa ketti. Dál osy kúni 2004 jylǵy jasóspirim de tilsiz jaýdyń qurbany bolǵan.
«Jyl basynan beri oblys ortalyǵynda sýda qaza bolǵandar sany 9 adamǵa jetken. Bul byltyrǵy jyldyń dál osy kezeńimen salystyrǵanda 1 adamǵa artyq. Onyń ishinde 2 jasóspirim bar», - deıdi Qyzylorda qalalyq tótenshe jaǵdaılar basqarmasynyń basshysy Erbol Álisherov.
Qyzylordada uıymdastyrylǵan reıdter barysynda qaýipti sý aıdyndarynan 500-den astam azamatqa eskertý jasalyp, olar úılerine qaıtaryldy. Al qalada sýdan qutqarýshylar sýǵa batyp bara jatqan 2 adamnyń ómirin saqtap qaldy.
