Qyzylorda oblysynda 14 Batyr ana saılaý ýchaskesine birge keldi

QYZYLORDA. QazAqparat - Qyzylorda oblysynda aýylda turatyn 14 Batyr ana bir saılaý ýchaskesinde birge tańdaý jasady, dep habarlaıdy QazAqparat tilshisi.

Jalaǵash aýdanyna qarasty Eńbek aýylynda turatyn Batyr analar burynnan belsendiligimen kózge túsip keledi. Basym kópshiligi aýylda qurylǵan otyz jyldyq tarıhy bar «Batyr analar» ansambilinde óner kórsetedi.

Olar búgingi Parlament Májilisi men máslıhattar depýtattaryn saılaý sharasynda da belsendilik tanytty. Aýylda ornalasqan №149 saılaý ýchaskesine jubyn jazbaı birge kelip, óz tańdaýyn jasady.

«Biz jas emespiz. Biraq qazaq halqynyń erteńi úshin, táýelsiz elimizdiń máńgilik bolýy úshin árbirimizdiń qosar úlesimiz bar ekenin bilemiz. Saıası naýqannyń mańyzdylyǵyn eskergendikten, barlyǵymyz birge daýys berýge keldik. Aldaǵy ýaqytta depýtat bolyp saılanatyn azamattardyń barlyǵy da el múddesine jumys isteıdi dep senemiz», - dedi Janymkúl Esimova.

Aıta ketsek, Qyzylorda oblysynda barlyǵy 486 002 adam saılaýshy retinde tirkelgen. Olardyń 20434-i Jalaǵash aýdanynda turady.

Eske salsaq, budan buryn Qyzylordada 100 jasaǵan qos qarııa alǵashqylardyń biri bolyp daýys bergenin jazǵan edik.