Qyzylorda oblysynda 1201 adamdy kene shaqty
QYZYLORDA. QazAqparat - Óńirlik kommýnıkatsııalar qyzmetinde ótken brıfıngte Qyzylorda oblysy qoǵamdyq densaýlyq saqtaý departamentiniń basshysy Ulbosyn Ahanaeva, oblystyq veterınarııa basqarmasynyń bólim basshysy Marat Oınarov, oblystyq juqpaly aýrýlar aýrýhanasynyń bas dárigeri Aına Muhambetova jáne Ulttyq saraptama ortalyǵy Qyzylorda oblystyq fılıalynyń dırektory Farıda Qalıeva Kongo-Qyrym gemorragııalyq qyzbasynyń epıdahýaly jáne aýrýdyń aldyn alý sharalary týraly aıtty.
Mamandardyń sózine qaraǵanda, aımaqta Qyrym qandy qyzbasynyń epıdemıologııalyq jáne epızootologııalyq ahýaly turaqsyz bolyp otyr, dep habarlaıdy QazAqparat tilshisi. Ústimizdegi jyly kene shaǵý jaǵdaılary boıynsha 1201 adam medıtsınalyq kómekke júgingen, bul ótken jyldyń osy merzimimen salystyrǵanda 7 paıyzǵa nemese 100 jaǵdaıǵa tómen. Alaıda 22 adam KQGQ-ǵa kúdikti retinde aýrýhanaǵa jatqyzylǵan, onyń ishinde 2 naýqastyń dıagnozy zerthanalyq jolmen naqtylanyp, bireýi qaıtys bolǵan.
-Kongo-Qyrym gemorragııalyq qyzbasy kóktem-jaz maýsymyna tán, sol sebepti epıdmaýsym jalǵasýda, ıaǵnı, kenelerdiń belsendiligi artýda. Jyl basynda ıksod keneleriniń sandyq kórsetkishi jáne olardyń belsendiligi artýy múmkin dep jasalǵan boljam naqtylanǵandaı. Óıtkeni qoralar men mal basynyń kenelenýine oraı turǵyndardan túsken aryz-shaǵymdar azaımaı otyr. Tabıǵı oshaqty zertteý maqsatynda aǵymdaǵy jyly zerthanalyq tekserýge 37509 kene jınalyp, sonyń 1190-y oń nátıjeli boldy,- deıdi U.Ahanaeva.
Aýrýdyń aldyn alý sharalary aýqymdy túrde atqarylýda. Bul oraıda oblystyq veterınarııa basqarmasy tarapynan ústimizdegi jyly indet oshaǵy bolyp tirkelgen 117 eldi mekendegi mal basy men qora jaılardyń aýmaǵyn zalalsyzdandyrý, sonymen birge ýaq mal basyn kenege qarsy vannalarda toǵytý jumystary júrgizilýde.
