Qyzylorda oblysynda 11 sport nysanynyń qurylysy júrip jatyr
Syr óńirine arnaıy saparmen kelgen QR Mádenıet jáne sport mınıstri Dáýren Abaev pen o blys ákimi Nurlybek Nálibaev birqatar mádenı jáne sport keshenderiniń jumysyn kórdi.
Mınıstr men oblys ákimi eń aldymen «Muz aıdyny» kesheninde balalarmen kezdesti. Munda muz aıdyny jáne voleıbol, basketbolǵa arnalǵan komandalyq oıyndar zaly bar.
Oǵan qosa jekpe-jek úshin oqý-jattyǵý zaly qyzmet kórsetedi jáne sporttyq bılerge arnalǵan horeografııalyq synyp qarastyrylǵan.
Qazirgi tańda nysanda 615 adam 7 sport túrinen jattyǵyp júr.
Al «Tarlan» sport kesheni 2016 jyly ashylǵan. Atalǵan nysanda bir mezette 120 jasóspirim sheberligin shyńdaı alady.
Sport kesheninde boks, kúres, taekvondo, aýyr atletıka jáne jattyǵý zaldary, demalys bólmeleri, medıtsınalyq kabınet, ashana men jataqhana bar.
Munda 100 bapker qyzmet atqarady. Olar 350-den astam shákirtke tálim beredi.
Búginge deıin sport kesheni qabyrǵasynda 20 QR sport sheberi, 78 QR sport sheberine úmitker daıyndalǵan.
Sport kesheni alańynda Nurlybek Nálibaev pen Dáýren Abaev jas sportshylarmen kezdesip, olardyń sportqa degen ynta-jigerin arttyrý baǵytyndaǵy sharalar týraly pikirlesti.
Oblys ákimi balalar jyly aıasynda óńirde demeýshiler kómegimen 80 oıyn alańyn salý bastalǵanyn jetkizdi. Sondaı-aq, Oqýshylar úıi de boı kóteretinin tilge tıek etti.
Mınıstr ulttyq sportty, onyń ishinde at sporty men at týrızmin zamanǵa saı jańǵyrtý maqsatynda «Uly dala joryǵy» atty jańa joba jaryqqa shyqqanyn atap ótti.
Bul oraıda 1200 shaqyrymdyq marafon-báıgege belsendilik tanytyp, jankúıer bolýǵa shaqyrdy.
Marafon elordadan bastap Aqmola, Qaraǵandy, Ulytaý, Qyzylorda jáne Túrkistan oblystaryn qamtıdy.
Ári qaraı mınıstr oblystyq mýzeıge baryp, Syr elindegi qundy jádigerlermen tanysty.
Ǵımaratta 11 kórme zaly bar, munda aımaq tarıhy kóne dáýirden bastap qazirgi zamanǵa deıin kórsetilgen. Mýzeıde 62 myńnan asa jádiger saqtaýly.
Dáýren Abaev Á.Tájibaev atyndaǵy oblystyq ámbebap ǵylymı kitaphanasynda oblys turǵyndarymen kezdesýge baryp, azamattarmen jeke qabyldaý ótkizdi. Ózekti saýaldarǵa jaýap berdi.
Eske salaıyq, Qyzylorda oblysynda ótken jyldan bastap 11 sport nysandarynyń qurylysy júrip jatyr.
Sonymen birge, bıyl 4 jańa nysan paıdalanýǵa beriledi dep kútilip otyr. Olardyń qatarynda Qazaly aýdanynyń Úrmásh Túktibaev aýyly, Jańaqorǵan aýdanynyń Aqjol aýyly, Shıeli aýdanyndaǵy Shıeli kentinde jáne Syrdarııa aýdanynyń Besaryq aýylyndaǵy sport keshenderi bar.
Eske salsaq, budan buryn Qyzylorda oblysynyń ákimi eńbekten bereke tapqan úlgili otbasylarmen kezdeskenin habarlaǵan edik.