Qyzylorda oblysynda 1 myńnan astam adamnyń ózin-ózi oqshaýlaý rejımin buzǵany anyqtaldy

QYZYLORDA. QazAqparat - Qyzylorda oblysynda Ashyq júıesi arqyly 1000-nan astam adamnyń ózin-ózi oqshaýlaý rejımin buzǵany anyqtaldy, dep habarlaıdy QazAqparat tilshisi.

Onyń ishinde 689 adam «qyzyl», 365 adam «sary» mártebede bolǵan. Infektsııa juqtyrǵan bolyp esepteletin «qyzyl» mártebedegi 689 adamǵa 4,7 mln teńgeden astam aıyppul salyndy. Al koronavırýs ınfektsııasymen aýyrǵan adamdarmen qarym-qatynasta bolǵan «sary» mártebedegi adamdarǵa tıisti qaýly shyǵaryldy.

«Halyq arasynda koronavırýs ınfektsııasy taralýynyń aldyn alý maqsatynda úı karantıni rejımin qatań saqtaýdy suraımyz. Qoǵamdyq oryndarǵa barmaýǵa, COVID-19 indetin taratý qaýpiniń aldyn alýǵa shaqyramyz», - dep málim etti Qyzylorda oblysynyń sanıtarııalyq-epıdemıologııalyq baqylaý departamentinen.

Eske salsaq, Qyzylordada koronavırýs juqtyrǵandardyń 95 paıyzy - vaktsına almaǵandar.