Qyzylorda oblysynan Paralımpıada oıyndaryna Daıana Fedosova qatysady

QYZYLORDA. QazAqparat - Qyzylorda oblysynyń ákimi Gúlshara Ábdiqalyqova Tokıoda ótetin HVI Paralımpıada oıyndaryna qatysatyn qyzylordalyq paradzıýdoshy Daıana Fedosovamen onlaın formatta kezdesti, dep habarlaıdy QazAqparat tilshisi.

Aımaq basshysy Daıanaǵa aldaǵy sport básekesine sáttilik tilep, Syr óńiriniń janashyr jerlesteri oǵan jankúıer bolatynyn jetkizdi.

«Sizde Syr óńiriniń sport tarıhynda tuńǵysh Paralımpıadaǵa qatysýshy retinde baǵalaımyz. Sondyqtan muny ózi zor jetistik dep bilemiz. Tokıoda bar kúsh-jigerińizdi sarqa jumsap, úzdik bolatynyńyzǵa senemiz», - dedi oblys ákimi.

Júzdesýde oblys ákimi Syr eli jurtshylyǵynyń atynan elimizdiń abyroıyn qorǵaıtyn sportshy qyzǵa kórsetiletin syı-sııapat retinde 500 myń teńgeniń sertıfıkatyn usyndy.

Óz kezeginde, Daıana sport básekesi aldynda ózine qoldaý bildirip, pikirlesken aımaq basshysyna jáne barsha sport janashyrlaryna alǵys bildirip, jerlesteriniń úmitin aqtaıtynyn aıtty.

Esterińizge sala keteıik, koronavırýs pandemııasyna baılanysty bir jylǵa shegerilgen HVI Paralımpıada oıyndary bıyl 24 tamyz ben 5 qyrkúıek aralyǵynda ótedi.

Fedosova Daıana Vladımırovna 2001 jyldyń 13 shildesinde Qyzylorda qalasynda dúnıege kelgen. Almaty qalasyndaǵy daryndy balalarǵa arnalǵan sport ınternatyn, Qyzylorda qalasyndaǵy «Bolashaq» kolledjin aıaqtaǵan.

Paradzıýdomen 2019 jyldan bastap aınalysady. Bapkeri - dzıýdodan QR eńbek sińirgen jattyqtyrýshysy Janarbek Sansyzbaev.

Ol Para dzıýdodan QR sport sheberi, QR chempıonatynyń jeńimpazy, QR Kýboginiń jeńimpazy, Gran-prı týrnıriniń qola júldegeri atanǵan.

Eske salsaq, budan buryn Qyzylorda jurtshylyǵy Qamshybek Qońqabaevqa kólik mingizdi.