Qyzylorda oblysyna Túrkııadan gýmanıtarlyq kómek kelip jetti
QYZYLORDA. QazAqparat - Qyzylorda oblysyna Túrkııadan gýmanıtarlyq kómek kelip jetti, dep habarlaıdy QazAqparat tilshisi.
Túrkııadan Qazaqstanǵa gýmanıtarlyq kómek pen 30 ókpeni jasandy jeldetý apparaty (IVL) jetkizilgen bolatyn. Onyń ishinde apparattyń 10-y Qyzylorda oblysyna berildi. Apparattyń 3-ýi oblystyq ftızıopýlmonologııa ortalyǵyna berildi. Al qalǵan 7-ýi óńirdegi ózge aýrýhanalarǵa jetkiziledi.
Aıta ketý kerek, Túrkııa úkimetimen birge qazaq qaýymdastyǵynyń ókilderi de elimizge qoldaý kórsetýde.
Oblys ákimi Gúlshara Ábdiqalyqova Tasbóget kentinde ornalasqan oblystyq ftızıopýlmonologııa ortalyǵyna bardy. Emdeý ornyna Túrkııadan kelgen ókpeni jasandy jeldetý (IVL) apparattaryn tabystady.
Joǵaryda atalǵan ortalyqta 120 oryndyq ınfektsııalyq statsıonar uıymdastyrylǵan. Onyń ishinde 6 tósek jansaqtaý bólimi bolyp ashylǵan. Búgingi tańda statsıonarda 111 naýqas em alýda, onyń 4 jansaqtaý bóliminde. Taǵy 9 azamat oblystyq kópbeıindi jáne qalalyq aýrýhanadan aýystyrylatyn bolady.
Aıta ketý kerek, «Vi-group» qurylys kompanııasy 10 ottegi kontsentratyn ftızıopýlmonologııa ortalyǵyna syıǵa tartqan.
Osyǵan deıin Qyzylordaǵa Ózbekstannan gýmanıtarlyq kómek kelgendigin jazdyq.
