Qyzylorda oblysyna sý basý qaýpi týyndady - Kósherbaev
QYZYLORDA. QazAqparat - Qyzylorda oblysynyń ákimdiginde óńir basshysy Qyrymbek Kósherbaevtyń tóraǵalyǵymen sý tasqynyna qarsy qaýipsizdikti qamtamasyz etý boıynsha jedel májilis ótti, dep habarlady QazAqparat HAA tilshisi.
- Aýyl sharýashylyǵy mınıstrliginiń málimeti boıynsha bizdiń oblysymyzda sý basý qaýpi týyndaýda. Buǵan sebep, Shardara men Kóksaraı sý qoımalary sýǵa tolyp, taýly aımaqtardaǵy jaýyn-shashyn saldarynan joǵarydan óte kóp mólsherdegi sýdyń kelýi. Aldyn ala eseptemeler boıynsha Syrdarııa ózeni arnasymen sáýir aıynyń 30-na sekýndyna 1600 tekshe metr mol sýdyń keletini anyqtalyp otyr. Bul ádettegiden eki ese kóp. Osyǵan oraı, jumyldyrý jáne tótenshe jaǵdaılar qyzmetteri, qala men aýdan ákimdikteriniń qabyldaǵan sharalary nátıjesinde darııadan osy kólemdegi sýdy qaýipsiz ótkizý qajet,-dedi oblys ákimi.
Sonymen qatar oblys ákimi mamyr aıynyń 15-ne deıin jaýyn-shashynnyń kóp kólemde bolý boljamyna sáıkes sý mólsheri sekýndyna 1800-2000 tekshe metrge deıin ósýi múmkin ekenin aıta kelip, aldaǵy mindet osy mol sýdy shyǵynsyz ótkizý dedi.
Munan soń oblys ákiminiń orynbasarlary Serik Qojanııazov pen Serik Súleımenov, qala men aýdan ákimderi, jaýapty mekeme basshylary, ardager mamandar óńirdegi ahýal týraly pikir-usynystaryn baıandady.
Jıyn qorytyndysy boıynsha oblys ákimi Q.Kósherbaev oblys boıynsha sý basý qaýpine baılanysty tótenshe jaǵdaıdyń aldyn alý sharalaryn jarııalady. Halyqtyń qaýipsizdigin qamtamasyz etý úshin barlyq múmkindikti paıdalana otyryp, jumyla jumys isteýge shaqyrdy. Jaýapty tulǵalarǵa naqty tapsyrmalar berdi. Mol sýdy qaýipsiz ótkizýdi qamtamasyz etý oblys ákiminiń orynbasarlary Serik Qojanııazov pen Serik Súleımenovke, aýdandar men qala ákimderine, jumyldyrý jáne tótenshe jaǵdaı memlekettik organdar basshylaryna júkteldi. 
