Qyzylorda oblysy jartyjyldyqty joǵary kórsetkishpen qorytyndylady
QYZYLORDA. QazAqparat - Qyzylorda oblysy alǵashqy jartyjyldyqty joǵary kórsetkishpen qorytyndylady, dep habarlaıdy QazAqparat tilshisi.
Statıstıkalyq málimetterge sáıkes oblystyń ekonomıkasy men birqatar mańyzdy salalarynyń damý dınamıkasynda ósý tendentsııasy baıqalady.
Óńirdiń ónerkásip kásiporyndarynda bıyl 344,7 mlrd teńgeniń ónimi óndirilip, óńdeý ónerkásibinde ósim 14,6 paıyzǵa jetken.
Atalǵan merzimde óńirge 104,7 mlrd teńge ınvestıtsııa tartylyp, 25,7 mlrd teńgege qurylys jumysy júrgizilgen.
Nátıjesinde 297,5 myń sharshy metr turǵyn úı paıdalanýǵa berildi. Bul ótken jyldyń eseptik merzimimen salystyrǵanda 105,3% kórsetip otyr.
Oblysta ındýstrııalandyrý baǵdarlamasy arqyly da birqatar aýqymdy jobalar jyl kóleminde júzege asady dep josparlanyp otyr.
Olardyń alǵashqysy «Orda Glass ltd» JShS enshisindegi «Tabaqsha shyny shyǵarý jáne óńdeý zaýytynyń qurylysy».
«Qarmaqshy qus» JShS jylyna 1500 tonna qus etin óndirý jobasyn bıyl júzege asatyn bastamalardyń qataryna kirgizip otyr.
Sondaı-aq, «Araltuz» AQ-nyń «As tuzyn óndirý», «Qazaq Qamel» JShS-niń «Túıe sútinen qurǵaq untaq shyǵarý óndirisi» de jyl josparyna engen jobalar qatarynda.
Jalpy quny 48,5 mlrd teńgeni quraıtyn bul jobalar iske asqanda óńirde jańadan 506 jumys orny qurylady dep josparlanǵan.
Aımaqta jyl basynan beri 16 myń 464 jańa jumys orny qurylyp, onyń ishinde 6 myń 328 turaqty jumys orny qalyptasqan.
Saladaǵy qıyndyqtarǵa qaramastan aýyl sharýashylyǵynyń jalpy óniminiń kólemi de 28,5 mlrd. teńgeni qurady.
Esepti kezeńde tiri salmaqta 17,4 myń tonna mal jáne qus eti, 40,9 myń tonna sút, 3,2 mln dana jumyrtqa óndirildi.
Qyzylordalyqtardyń ortasha aılyq jalaqysy da joǵarylaǵan.
Máselen sońǵy málimetterge sáıkes bir qyzmetkerdiń ortasha aılyq jalaqysy 194 myń 678 teńgege jetip, 2020 jyldyń tıisti kezeńimen salystyrǵanda 117,4% quraǵan.
