Qyzylorda oblysy Tatarstanmen ózara yntymaqtastyq týraly memorandýmǵa qol qoıdy

 Bul týraly QazAqparat tilshisi oblystyq ákimdikke silteme jasap habarlady.

Qyzylorda oblysynyń ákimi Qyrymbek Kósherbaev bastaǵan delegatsııa aqparattyq tehnologııalar, aýyl sharýashylyǵy jáne ındýstrııa salalaryndaǵy jobalardy júzege asyrýda tájirıbe almasý maqsatynda Tatarstan Respýblıkasyna saparmen bardy. Delegatsııa quramynda memlekettik organ basshylary jáne óńirlik kompanııalar men mekemelerdiń ókilderi bar.

Qazan qalasyndaǵy Investıtsııalar agenttiginde Tatarstan Respýblıkanyń ekonomıkalyq áleýeti tanystyryldy.

Munan keıin qyzylordalyq delegatsııa «Eıdos» medıtsınalyq ǵylym ortalyǵynyń medıtsınalyq sımýlıatorlardy shyǵaratyn óńirlik ınjınırıng ortalyǵynyń jumysymen tanysty. Ortalyq 2013 jyly  ashyldy jáne jetekshi ǵylymı-óndiristik uıymdarmen birlesip medıtsına salasyndaǵy joǵary tehnologııalyq zertteýlermen aınalysady.

Sonymen qatar, qyzylordalyqtar «Qazan» agroónerkásip parkiniń jumysymen tanysty. Zamanaýı kópfýnktsıonaldy tehnologııalyq keshende «fermerden tutynýshyǵa deldalsyz jetkizý» qaǵıdasyna negizdelgen aýylsharýashylyq ónimderin satý júıesi eńgizilgen. Bul júıe óndirýshige tabysty bıznes júrgizý úshin jaǵdaı jasasa, tutynýshyǵa sapaly ónimdi tıimdi baǵamen satyp alýǵa múmkindik beredi. Agropark aımaǵynda aýylsharýashylyq ónimderin óndirýshiler ónimderin bir alańqaı aıasynda saqtaýǵa, óndeýge, qaptaýǵa jáne satýǵa barlyq jaǵdaı jasalǵan.

Sonymen qatar, delegatsııa músheleri sapardyń negizgi nysany - Qazan qalasynan 40 shaqyrym qashyqtyqta ornalasqan «Innopolıs» erekshe ekonomıkalyq aımaqty aralap kórdi. Innopolıs - ІT-mamandar úshin 2015 jyly ashylǵan alǵashqy reseılik qala. «Aqyldy qala» tujyrymdamasy aıasynda Innopolıs turǵyndary jaıly ómir súrý maqsatynda ınfraqurylym, bıznes, bilim alý, qyzmet kórsetý jáne turmystyq nysandar salyndy. Qazirgi tańda Innopolıste 3 myńnan astam adam turady jáne 120 kompanııa, onyń ishinde «Innopolıs» EEA 56 rezıdenti men seriktesi tirkelgen. Qyzylordalyqtar «Innopolıs» ýnıversıteti men lıtseıiniń, problemalyq zerthanalar men eńgizilgen korporatıvtik basqarý qaǵıdalaryna úlken qyzyǵýshylyq bildirdi.

Sapar qorytyndysynda Tatarstan Respýblıkasynyń basshylyǵymen kelissózder júrgizilip, oblys ákimi Qyrymbek Kósherbaev birlesip atqaratyn jumystar týraly baıandap, Qyzylorda qalasynda kúzde ótetin «Sabantoı» respýblıkalyq tatarlar merekesine qatysýǵa shaqyrdy.

«Biz aqparat jáne sandyq tehnologııalar dáýirinde ómir súrip jatyrmyz, al Tatarstan bul baǵytta tek reseılik qana emes, búkil burynǵy Keńes odaǵynyń aýmaǵynda kóshbasshy sanalady. Munda kóptegen tyń jańalyqtar kóp ekenine Innopolıs qalasyna barǵanda kózimiz jetti. Tatarstan prezıdenti Mınnıhanov Rýstam Nurǵalıulyna bizdiń jastardy Innopolıs ýnıversıtetinde oqytý ıdeıamyzdy qoldaǵany úshin alǵys bildiremiz. Biz qazir áriptestik jónindegi birlesken Jol kartasyn ázirleýge kiristik», - dedi oblys ákimi Q.Kósherbaev.

Tatarstan Respýblıkasynyń prezıdenti Rýstam Mınnıhanov Qyzylorda oblysymen áriptestik ornatýǵa qyzyǵýshylyq bildirdi.

«Qyzylorda oblysy belsendi damyp, ınvestorlardy kóptep tartyp jatyr. Biz Qazaqstan aımaqtarymen ekonomıkalyq-saýda salasymen qatar, bilim, ınfraqurylym-ınnovatsııalyq damý, týrızm salalary boıynsha áriptestik jasaýǵa múddelimiz. Bıznesti qoldaý sharttary da tıimdi kórinedi», - dedi R.Mınnıhanov.

Esterińizge sala keteıik, Tatarstan prezıdenti Rýstam Mınnıhanov ótken jyly jeltoqsan aıynda Qyzylorda oblysyna qysqa merzimdi jumys saparmen kelgen bolatyn.

Sondaı-aq, Qyzylorda oblysy men Tatarstan Respýblıkanyń negizgi áriptestik salalary bilim men densaýlyq saqtaý ekenin atap ótken jón.

Munan bólek, Reseı Federatsııasyna jumys sapary aıasynda Qyzylorda oblysynyń ákimi Q.Kósherbaev jáne birqatar memlekettik organ basshylary 16-18 qańtar kúnderi Máskeý qalasynda Halyq sharýashylyǵy jáne memlekettik qyzmet akademııasynda ótken «Gaıdar forýmyna» qatysty.

Forým barysynda ekonomıka jáne sandyq tehnologııalarǵa aýysý, tórtinshi ónerkásiptik revolıýtsııa kezeńinde transformatsııalar sekildi búkil dúnıejúzilik qoǵamdastyqty qyzyqtyratyn jahandyq trendter talqylandy.

Aıta ketken jón, «Gaıdar forýmy» - 2010 jyldan bastap ótkiziletin ekonomıka salasyndaǵy jyl saıynǵy halyqaralyq ǵylymı-praktıkalyq konferentsııa. Forýmdy uıymdastyrýshylar - RHShjMQA, E.T.Gaıdar atyndaǵy Ekonomıkalyq saıasat ınstıtýty jáne Reseı ınnovatsııalyq aımaqtar qaýymdastyǵy, forýmǵa reseıli jáne sheteldik iri ǵalymdar, sarapshylar, memlekettik organdar men bıznes uıymdarynyń jetekshileri qatysady.

Uıymdastyrýshylardyń aıtýynsha, bıyl qatysýshylar sany Forým tarıhyndaǵy rekordtyq kórsetkishke - 15 myń adamǵa jetken.