Qyzylorda oblysy: Senatorlar aýyl turǵyndarynyń muń-muqtajyn bilip qaıtty
QYZYLORDA. QazAqparat- QR Parlamenti Senatynyń depýttary Murat Baqtııaruly men Bekmyrza Elamanov Qyzylorda oblysy, Syrdarııa aýdany Qaljan Ahýn aýylynyń turǵyndarymen kezdesti.
Bul týraly «QazAqparat» HAA tilshisi aýdandyq ákimdikke silteme jasap habarlady.
Kezdesýge aýdandyq máslıhat hatshysy Erjan Ájikenov, «Nur Otan» partııasy aýdandyq fılıal tóraǵasynyń orynbasary M.Omarov jáne máslıhat depýtattary men aýyl turǵyndary qatysty.
Kezdesý barysynda depýttar jyl boıyna atqarylǵan jumystarǵa toqtalyp, halyq aldynda esep berdi. 2016 jyly Senat otyrysynda qabyldanǵan 104 zańnyń birqataryna sholý jasalyp, túsindirme jumystary júrgizildi. Jáne de qazirgi tańda halyqqa áleýmettik kómek berý boıynsha jumystar atqarylyp jatqandyǵy jetkizildi. Óz kezeginde turǵyndar tarapynan saýaldar qoıylyp, tuşymdy jaýaptar alyndy. Halyqty tolǵandyrǵan máseleler kóterilip, jurtshylyqtyń talap-tilekteri eskerildi.
Budan keıin halyq qalaýlylary kent ortalyǵynda ornalasqan №36 Á.Tájibaev atyndaǵy mektep-lıtseıde bolyp, bilim ordasynyń jaı-kúıimen tanysty. Ustazdar qaýymymen kezdesip, bilim salasyndaǵy ózgeristerge qanyqty. Kezdesý sońynda depýtattar pedagogtardyń jumystaryna sáttilik tiledi.
