Qyzylorda oblysy órt sóndirý qyzmetiniń qyzmetkerleri erligi úshin marapataldy
ASTANA. 15 maýsym. QazAqparat - Qyzylorda oblysy órt sóndirý qyzmetiniń qyzmetkerleri memlekettik jáne vedomstvolyq marapattarǵa ıe boldy.
Olardyń arasynda Qyzylorda oblysynyń № 9 órt sóndirý bóliminiń bastyǵy órtke qarsy qyzmet kapıtany Nurbol Ibragımuly Isanov, № 9 órt sóndirý bóliminiń aǵa órt sóndirýshisi órtke qarsy qyzmet serjanty Naýryzbaı Serikboluly Júsipov «Qutqarý operatsııalaryna belsendi qatysqany úshin» tós belgimen marapattalǵan bolatyn, - dep habarlaıdy QR Tótenshe jaǵdaılar mınıstrliginiń baspasóz qyzmeti.
2011 jylǵy 7 mamyrda 14 saǵat 55 mınýtta ortalyq órt sóndirý pýnktine Qyzylorda qalasynyń temirjolyndaǵy sý toltyratyn aspaly joldaǵy órt týraly habar kelip tústi.
Oqıǵa ornyna № 9, 11 órt sóndirý bóliminiń kezekshi qaraýyldary jiberildi. Órt sóndirýshiler kelgen kezde janǵysh suıyǵy bar 60 tonnalyq tsısterna jalyndap jatqandyǵy baıqaldy. Órtti sóndirý úshin Qyzylorda oblysynyń TJD «Órt sóndirý jáne apattyq qutqarý jumysy qyzmeti» MM-niń qosymsha kúshteri jáne quraldary tartyldy.
Oqıǵa ornynda janarmaıy bar 15, benzıni bar 1 tsısterna bolatyn. Sondyqtan da órtti sóndirý qıynǵa soqty.
Órtti sóndirý kezinde tutanǵan tsısterna jarylysyn jáne temperatýranyń kóterilýin boldyrmaý mindeti alǵa qoıyldy. № 9 órt sóndirý bólimi bastyǵynyń nusqaýy boıynsha órtke qarsy qyzmet serjanty Naýryzbaı Júsipov aldyn ala kıgizdi sýlap tsısterna lıýgyn japty. Óziniń ómirin táýekelge tigip, qyzmetker 10-15 mınýt ishinde otteginiń ótý kózin jaýyp, kıgizdi ustap turdy.
Kúrdeli shuǵyl jaǵdaıda № 9 órt sóndirý bóliminiń bastyǵy órtke qarsy qyzmet kapıtany Nurbol Isanov órt sóndirý kezinde kásibı áreket etti, er júrektilik, ustamdylyq jáne shydamdylyq tanytty, jaýyngerlerge biliktilikpen basshylyq etti. Onyń áreketiniń jáne jeke quram óz mindetterin naqty oryndaýdyń arqasynda ottyń taralýy toqtatyldy. Órt 15 saǵat 35 mınýtta óshirildi.
