Qyzylorda oblysy kúrish jınaýda byltyrǵy rekordty jańartpaq
QYZYLORDA. QazAqparat - Bıyl Qyzylorda oblysy kúrishten mol ónim jınap, byltyrǵy rekordtyq kórsetkishten de asyp túspek.
Bul týraly oblys ákimi Qyrymbek Kósherbaev oblystyq máslıhat sessııasynda sóılegen sózinde baıandady.
«Byltyr biz kúrishten mol ónim alyp, rekordtyq kórsetkishke qol jetkizgen bolatynbyz (423,6 myń tonna, gektarynan 50,5 tsentner). Aýylsharýashylyq taýarlaryn óndirýshilerdiń pikirinshe, bıylǵy jınalatyn ónim ótken jylǵa qaraǵanda eń kem degende 10%-ǵa joǵary bolmaq. Búgingi tańda 1 ga kúrishtiń ortasha ónimdiligi gektaryna 46 tsentner bolsa, rekordtyq mejege qol jetkizgen 2015 jyly gektaryna 41,9 tsentner boldy. Osy rette, sýbsıdııalaý júıesin kezeń-kezeńimen reformalaý týraly usynysymyzdy qoldaǵany úshin Úkimetke alǵys aıta ketkim keledi»,- dedi aımaq basshysy Qyrymbek Kósherbaev.
Aıta ketý kerek, aǵymdaǵy jyly aýyl sharýashylyǵyn qoldaýǵa barlyǵy 8,5 mlrd. teńge (2015 jylǵa qaraǵanda 400 mln. teńgege nemese 5%-ǵa kóp) bólindi. Jalpy, bıylǵy jyly aýyl sharýashylyǵynyń negizgi kapıtalyna tartylǵan ınvestıtsııa kólemi 10 esege artty.
