Qyzylorda oblysy: Qazalydaǵy balalar lagerin sý basty
QAZALY. QazAqparat - Qyzylorda oblysynda Qazaly qalasynda ornalasqan «Shaǵala» lageriniń aýmaǵyna sý jaıyldy, dep habarlaıdy QazAqparat.
Qazaly aýdany ákimdigi baspasóz qyzmetiniń ókili Záýresh Oraqqyzynyń málimetinshe, Syrdarııa ózenindegi muz keptelisteri saldarynan sý deńgeıi kóterilip, Qazaly qalasyndaǵy «Shaǵala» lageriniń janyndaǵy qorǵanys bógetin buzǵan. Lagerdiń aýmaǵyna sý jaıylǵan.
«Sý basý qaýpiniń aldyn alý maqsatynda arnaıy tehnıkalar arqyly topyraqpen bekitý jumystary júrgizilýde. Balalardy saýyqtyrý ortalyǵy jaz mezgilinde jumys isteıtindikten zardap shekkender joq», - deıdi ol.
Budan bólek, ákimdiktiń baspasóz qyzmeti darııa boıyndaǵy sý basý qaýpi bar Sarykól, Birlik, Órkendeý, Aryqbalyq, Kólaryq, Maıdakól aýyldyq okrýgteri boıynsha táýlik boıy kezekshilik bekitilip, qajetti qaýipsizdik sharalary qabyldanǵanyn málimdedi.
Qazirgi tańda aýdan boıynsha jaǵdaı turaqty baqylaýda.
