Qyzylorda oblysy: Qazalyda kópqabatty 6 turǵyn úı salynýda
QAZALY. QazAqparat - Qazaly aýdanynda 18 páterli alty turǵyn úıdiń qurylysy júrgizilip jatyr, dep habarlaıdy QazAqparat tilshisi.
Qyzylorda oblysynyń ákimi Qyrymbek Kósherbaev Qazaly aýdanynda turǵyn úıler qurylysynyń alańynda boldy. Qazirgi tańda bir turǵyn úıdiń qurylysy aıaqtalǵan, qalǵan beseýi boıynsha jumystar qarqyndy júrgizilýde. Bir úıde eki bólmelik 12 páter, úsh bólmelik 6 páter bolady.
Sondaı-aq aımaq basshysy Qazaly qalasy men Áıteke bı kenti aralyǵyndaǵy ınjenerlik kommýnıkatsııalardy júrgizý boıynsha atqarylǵan istermen tanysty.
Qazaly aýdanynyń ákimi Murat Ergeshbaevtyń baıandaýynsha, aýdandy damytýdyń bas josparyna sáıkes, aldaǵy ýaqytta Áıteke bı kentin Qazaly qalasymen biriktirý josparlanýda. Qazirgi tańda tabıǵı gaz, aýyz sý jáne elektr energııasyn tartý, sondaı-aq jalpy kólemi 500 gektar aýmaqqa jol salý qurylysy júzege asyrylýda. Injenerlik kommýnıkatsııalardy júrgizý jumystary 2019 jyly aıaqtalady dep josparlanýda.
Budan bólek, búgin Qyrymbek Kósherbaev Qazaly aýdanynda aǵymdaǵy jyldyń qazan aıynda «Senim-Tabıǵat» JShS men «Baıqońyr» ÁKK birlesip salǵan «Qazaly Kerýen» kólik, saýda-logıstıkalyq ortalyǵynyń jumysymen tanysty. Kásiporynnyń saparjaıy saǵatyna 250 jolaýshyǵa qyzmet kórsetedi. Nysanda avtoturaq, kólikke tehnıkalyq qyzmet kórsetý jáne saýda oıyn-saýyq ortalyǵy qyzmet atqarady.
