Qyzylorda oblysy ındýstrııalyq aımaqtar tıimdiliginiń kórsetkishi boıynsha kósh bastap tur
NUR-SULTAN. QazAqparat - Indýstrııalyq jobalardy iske asyrýǵa ınvestıtsııa tartý boıynsha Qyzylorda oblysy respýblıka boıynsha reıtıngte kósh bastap tur, sondaı-aq, ındýstrııalyq aımaqtar (IA) men ornalastyrylǵan jobalar sany boıynsha ekinshi orynda, dep habarlaıdy óńirlik ákimdiktiń baspasóz qyzmeti.
Máselen, ındýstrııaldyq aımaqtarda jobalardy iske asyrýǵa 65,2 mlrd. teńge ınvestıtsııa tartyldy, bul - respýblıka boıynsha eń úzdik kórsetkish.
Oblysta 6 ındýstrııalyq aımaq quryldy. Onda jalpy somasy 192 mlrd.teńgege 48 joba júzege asyrylady.
Atap ótý qajet, barlyq ındýstrııalyq aımaqtardyń ınfraqurylymyna 6,7 mlrd. teńge bıýdjet qarajaty jumsalyp, ınvestıtsııalyq jobalardy iske asyrý esebinen 1 bıýdjettik teńgege 13,4 teńge qaıtarymdy jeke ınvestıtsııa tartyldy.
Oblystyq ındýstrııalyq-ınnovatsııalyq damý basqarmasynyń málimetine sáıkes, óńirde 500-den astam jumys ornyn qamtıtyn 16 joba iske qosylǵan. Olardyń qatarynda ótken jyly jeltoqsan aıynda merziminen buryn iske qosylǵan iri joba - tamponajdy tsement shyǵarý zaýyty bar. Kásiporyn aǵymdaǵy jyldyń sáýir aıynda 10 myńǵa jýyq tonna synama tsement óndirdi. Jyl sońyna deıin 500 myń tonna ónim óndirip, jobalyq qýattylyqty 50%-ǵa ıgerýdi josparlaýda. Qazirgi tańda kásiporynda 250 adam jumyspen qamtylyp otyr.
Búgin QR Úkimeti otyrysynda arnaıy ekonomıkalyq jáne ındýstrııalyq aımaqtardy damytý máseleleri qaralyp, Indýstrııa jáne ınfraqurylymdyq damý, energetıka mınıstrlikteriniń, "Samuryq-Qazyna" UÁQ" AQ men oblys ákimderiniń baıandamalary tyńdaldy. QR Úkimetiniń selektorlyq otyrysynda Qyzylorda oblysynyń ındýstrııalyq aımaqtardy damytý boıynsha oń tájirıbesi atap ótildi.
