Qyzylorda oblysy halqynyń ómir súrý uzaqtyǵy 72,2 jasqa jetti
ASTANA. QazAqparat - Óńirlik kommýnıkatsııalar qyzmetinde ótken baspasóz máslıhatynda Qyzylorda oblystyq densaýlyq saqtaý basqarmasynyń basshysy Aqmaral Álnazarova óńirde «Deni saý aımaq» jobasy qolǵa alynǵandyǵyn málim etti, dep habarlaıdy óńir basshysynyń resmı saıty.
Mundaı joba respýblıka boıynsha tek syr boıynda ǵana júzege asýda.
"Oblys ákiminiń qoldaýymen «2018-2021 jyldarǵa arnalǵan «salaýatty ómir saltyn qalyptastyrý jáne qan aınalymy júıesi aýrýlarynyń aldyn alý jónindegi is-sharalar» jospary bekitilgeni belgili. Onda 5 naqty mindet qoıylǵan. ıAǵnı, azamattardyń týylǵannan bastap, qartaıǵan shaǵyna deıingi densaýlyǵyn qadaǵalaý basty maqsat. Naqtyraq aıtsaq, árbir turǵynnyń zııandy ádetterden bas tartýy, tamaqtanýy, dene belsendiliginiń artýy, qan qysymy aýrýlarynyń ólshemdik sheginiń qoıylýy, tolyq medıtsınalyq tekserýden ótkizilýi, salaýatty mektep jobasynyń qatań baqylanýyn qolǵa alýy. Mine, osy joba arqyly tikeleı azamattarmen ózimen jumys jasaýǵa múmkindigimiz týady", - dedi oblystyq densaýlyq saqtaý basqarmasynyń basshysy A.Álnazarova.
Búgingi tańda Qyzylorda oblysy halqynyń ómir súrý uzaqtyǵy 72,2 jasqa jetti
Sondaı-aq, qan aınalym júıesinen ólim-jitim kórsetkishi 20,5% tómendedi. Respýblıka boıynsha Qyzylorda óńiri - 15 orynda.
Jalpy, oblys halqyna 2488 dáriger, 9301 orta býyn mamandar medıtsınalyq qyzmet kórsetedi. 2018 jyldyń 6 aıdaǵy qorytyndysy boıynsha oblys deńgeıindegi dáriger tapshylyǵy ótken jylmen salystyrǵanda edáýir azaıǵan.
Sonymen qatar, byltyr aımaqqa 143 dáriger tartylyp, olardyń 57,3% (82 dáriger) búginde eldi mekende jumys jasaýda. Al oblys ákiminiń grantymen 22 rezıdent respýblıkamyzdyń 4 joǵary medıtsınalyq bilim berý oryndarynda oqýlaryn jalǵastyrýda.
Aıta ketý kerek, baspasóz máslıhatynda dárigerler men orta býyn medıtsına qyzmetkerleriniń biliktiligin kóterýge bólingen qarjy kólemi byltyrǵy jylmen salystyrǵanda 1,4 esege artqany aıtyldy. Bul qarjy Koreıa memleketinde 7 mamandy oqytýǵa, Tatarstan Respýblıkasynyń Qazan qalasynda 24 dárigerdiń biliktiligin arttyrýǵa baǵyttalǵan.
