Qyzylorda oblysy halqynyń 97 paıyzy taza aýyz sýmen qamtylǵan
QAZALY. QazAqparat - Aral aýdany Shıjaǵa eli mekeninde qaıta jańǵyrtylǵan sýmen qamtý júıelerin iske qosý rásimi ótti. Oǵan Qyzylorda oblysynyń ákimi Qyrymbek Kósherbaev qatysty, dep habarlaıdy QazAqparat tilshisi.
Aral aýdany əkiminiń baspasóz hatshysy Saıa Eralıevanyń habarlaýynsha, Aral aýdanynda memlekettik qazynadan qarajat bólinip, jurtshylyq úshin asa mańyzdy bolyp otyrǵan aýyz sý máselesi jyl ótken saıyn ońtaıly sheshimin taýyp keledi. Kúrmeýi qıyn másele búginde «Nurly jol» memlekettik baǵdarlamasy aıasynda sheshim taýyp, júzege asyp jatyr. Bul baǵytta Aral aýdanynda aıtarlyqtaı ister atqarylýda.
Osy oraıda, ótken jyly aýdandaǵy 7 eldi mekende aýyz sýmen qamtý júıelerin júrgizý qolǵa alynyp, aýqymdy jumystar atqaryldy.
«Merdiger mekeme ózine júktelgen mindetti abyroıly atqaryp, eldi mekenderdiń sýmen qamtý júıelerin qaıta jańǵyrtý jáne keńeıtý jumystaryn tolyq aıaqtady. Jumys barysynda barlyǵy 43,5 shaqyrym magıstraldi jeli júrgizilip, sý sorǵy stantsııasy kúrdeli jóndeýden ótti. Sonymen qatar, eldi meken boıynsha, 409 dana sý eseptegish qurylǵysy jáne 212 kórý qudyqtary ornatylǵan. Sý munarasynyń kólemi - 50 tekshe metr», - deıdi baspasóz hatshy.
Aıta ketý kerek, Qyzylorda oblysynda taza aýyz sýmen qamtý kórsetkishi respýblıka boıynsha eń joǵary- 97 paıyz. Aldaǵy jyldary eldi mekenderdi sýmen qamtý kórsetkishi 100 paıyzǵa jetkiziletin bolady.
