Qyzylorda oblysy: Eń basty mindet - jumyssyzdyqty 4,9 paıyzǵa azaıtý
QYZYLORDA. QazAqparat - Bıyl 1 kent jáne 13 aýyldyq okrýg jańa bıýdjettik saıasatqa ótti. Endi aýyl ákimderi óz bıýdjetterine qosymsha qarjy túsirip, ishki sharýasyn sheshýde qarjylyq negiz bolatyn shaǵyn jáne orta kásipkerlikti damytý boıynsha jumystar jasaýda, dep habarlaıdy QazAqparat tilshisi.
"Bıylǵy jyldyń eń basty mindeti - jumyssyzdyqty 4,9 paıyzǵa azaıtý. Osy jyldyń qańtarynan kúshine engen «Ataýly áleýmettik kómektiń jańa formaty» kóptegen otbasyna qıyndyqtar týdyrý qaýpi bar. Bizdiń aldymyzda, áleýmettik kómek alatyn 710 otbasyny jumyspen qamtý mindeti tur. Bul baǵytta árbir eldi mekennen keminde 30 otbasynyń óz kásibin ashý úshin nesıe alýyna kómektesemiz, sol arqyly jumyssyzdyqty azaıtamyz»,- dedi búgin Óńirlik kommýnıkatsııalar qyzmetinde ótken baspasóz máslıhatynda Shıeli aýdanynyń ákimi Áshim Orazbekuly.
Sonymen qatar, aýdanǵa qarasty aýyldarda shashtaraz, monsha, kıim tigý tsehtary joq. Memlekettik baǵdarlamalardy paıdalana otyryp, nesıe nemese granttyq qarjylarǵa osy kásip túrlerin qolǵa alý josparlanýda.
Aıta ketý kerek, bıyl kent ortalyǵynan 6 jerden jeke kásipkerler esebinen skverler salynbaqshy. Sondaı-aq, osyndaı jumys jergilikti kásipkerlerdiń demeýshiligimen eldi mekenderde de júrgiziledi.
