Qyzylorda oblysy bıylǵy birinshi toqsanda 173,3 mlrd. teńgeniń ónimin óndirdi
QYZYLORDA. QazAqparat- Qyzylordada bıylǵy jyldyń alǵashqy toqsanynyń qorytyndysy boıynsha oblys ákimdiginiń keńeıtilgen otyrysy ótti, dep habarlady QazAqparat HAA tilshisi oblystyq ákimdikke silteme jasap.
Oblystyń alǵashqy úsh aıdaǵy áleýmettik-ekonomıkalyq damýy týraly oblys ákiminiń orynbasary Qýanyshbek Ysqaqov baıandady.
«2017 jyldyń qańtar-naýryzynda oblystyń ónerkásip kásiporyndary 173,3 mlrd. teńgeniń ónimin óndirdi. Naqty kólem ındeksi 95,4 paıyz boldy. Sonymen qatar, óńdeý ónerkásibinde de ósý baıqalýda. Tamaq ónimderi jáne basqalaı metal emes mıneraldyq ónimderdiń artýy esebinen óńdeý ónerkásibinde ósim 9,6 paıyzǵa jetti»,- dedi Ysqaqov.
Jalpy, oblys ekonomıkasynyń mańyzdy baǵyttarynda ósim bar. Mysaly, negizgi kapıtalǵa salynǵan ınvestıtsııalar kólemi 26,6 mlrd. teńgeni qurady (ósim - 4,6%), qurylys jumystarynyń kólemi - 5,7 mlrd. teńge (ósim - 6,1%). 137,9 myń sharshy metr turǵyn úı paıdalanýǵa berildi (ósim - 37,1%).
Aýyl sharýashylyǵy ónimderiniń jalpy kólemi 6,9 mlrd.teńgeni qurady (ósim - 2,4%). Memlekettik bıýdjetke 24 387,5 mln. teńge salyq jáne basqa da mindetti tólemderden túsim tústi nemese boljamǵa sáıkes 110,0% boldy. Onyń ishinde respýblıkalyq bıýdjetke 14 551 mln. teńge (boljamǵa sáıkes 102,6%), jergilikti bıýdjetke 9 836,5 mln. teńge (boljamǵa sáıkes 123,2 %) tústi.
Jıynda oblys ákiminiń orynbasary Evgenıı Kım, oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Amanjol Aldajarov, aýyl sharýashylyǵy basqarmasynyń basshysy Baqyt Jahanov memlekettik baǵdarlamalardyń júzege asyrylý barysy týraly baıandama jasady.
Keńeıtilgen májilisti qorytyndylaǵan oblys ákimi Qyrymbek Kósherbaev jyldyń alǵashqy toqsanynda jaqsy nátıjelerge qol jetkenin jáne aımaqtyń áleýmettik-ekonomıkalyq damýyn qamtamasyz etetin jumystardy odan ary jalǵastyrýdy tapsyrdy.
