Qyzylorda oblysy Bıdaıkól aýylyna gaz tartyldy
Tuńǵysh Prezıdent - Elbasy Nursultan Nazarbaev 2018 jylǵy 5 qazandaǵy Qazaqstan halqyna Joldaýynda óńirlik jáne qalalyq ınfraqurylymdy júıeli túrde damytý qajettigine toqtalyp ótti. Syr óńirinde atalmysh baǵytta nátıjeli ister júzege asyp keledi.
Shıeli kenti turǵyndary 2015 jyly «kógildir otynǵa» qol jetkizdi. Búgingi kúnderi aýdanǵa qarasty birqatar eldi meken turǵyndary gazdy paıdalana bastady. Byltyr Ybyraı Jaqaev aýylynyń jurtshylyǵy gaz ıgiligin kórýge qol jetkizdi. Endi onyń qataryna Bıdaıkól aýyly qosylyp otyr. Bıdaıkól aýyly aýdan ortalyǵy - Shıeli kentinen 3 shaqyrym jerde oryn tepken. Qazir eldi mekende 3 myńǵa tarta adam turady.
Bıdaıkól aýyly turǵyn úılerine gaz júrgizý jumysyn «Demeý IK» JShS óz qarjysy esebinen júrgizdi. Búgingi kúnge 21 shaqyrym kóshe boıy qazylyp, qubyr tartý júzege asty.
Búgingi tańda Qyzylorda oblysynda Aral, Qazaly, Shıeli, Jańaqorǵan aýdandarynyń ortalyqtary gazǵa qosylǵan. Bul joba «Beıneý-Bozoı-Shymkent» magıstraldy gaz qubyry boıynsha qolǵa alynǵan. Nátıjesinde atalmysh aýdandarda 22 myńnan astam otbasy «kógildir otyn» ıgiligin kórip otyr.
Aldaǵy ýaqytta Qarmaqshy, Jalaǵash, Syrdarııa aýdandarynyń ortalyqtary jáne Aral aýdanyndaǵy Jaqsyqylysh kenttin gazdandyrý baǵytynda tıisti jumystar atqarylyp keledi.