Qyzylorda oblysy bas sanıtarııa dárigeriniń jańa qaýlysy shyqty
Aımaqta koronavırýs ınfektsııasy boıynsha epıdemıologııalyq ahýal turaqtandy.
Osyǵan baılanysty birqatar shekteý sharalary alynyp tastaldy.
Buǵan deıin qabyldanǵan oblystyń bas memlekettik sanıtarııa dárigeriniń keıbir qaýlylarynyń kúshi joıyldy.
Olardyń qatarynda 2021 jylǵy 27 tamyzdaǵy №23, 2022 jylǵy №1, 2, 3, 4 qaýlylary bar.
«Eki jyl ishinde koronavırýs ınfektsııasy epıdahýalynyń órshýi 1 aıdan 3 aıǵa deıin sozylyp 5 ret kóterildi. Bul rette syrqattanýdyń árbir kóterilýi aldyńǵy kórsetkishterden joǵary boldy. Antırekordtar jańardy. KVI boıynsha profılaktıkalyq jáne epıdemııaǵa qarsy is-sharalardy ýaqtyly júrgizý aýrýdyń taralý qarqynyn tejeýge jáne densaýlyq saqtaý júıesiniń shamadan tys júktemesine jol bermeýge yqpal etti, der kezinde qabyldanǵan sharalardyń arqasynda búginde indettiń zardaby azaıdy. Halyq arasynda vırýs taralýynyń aldyn alý sharalary áli de belsendi júrgizilýde. Degenmen elde qalyptasqan turaqty epıdemıologııalyq ahýaldy eskere otyryp, birqatar shekteý sharalary óz kúshin joıdy», - dedi Qyzylorda oblysy bas memlekettik sanıtarııa dárigeri Dınara Jańabergenova.
Vedomstvo málimetinshe, Qazaqstan aýmaǵynda COVID-19 taralýynyń aldyn alý jónindegi vedomstvoaralyq komıssııanyń sheshimimen kezekti jeńildikter qabyldandy.
«Epıdemıologııalyq táýekeldiń «sary» jáne «jasyl» aımaqtarynda ornalasqan óńirlerdegi barlyq obektilerde «Ashyq» mobıldi qosymshasyn qoldaný mindeti, áleýmettik araqashyqtyqty saqtaýǵa qoıylatyn talaptar men mindetti termometrııa alynyp tastalady. Sondaı-aq epıdemıologııalyq qaýip-qaterdiń barlyq aımaqtarynda ashyq aýada maskalardy mindetti túrde kııý talaby joıylady», - dedi D. Jańabergenova.
