Qyzylorda oblysy: Aýyl turǵyndarynyń máselelerin sheshý – senatorlar nazarynda
Senatorlar Qarmaqshy aýdanynda kóktemgi egiske daıyndyq jumystarynyń basy-qasynda bolyp, aýyl eńbekkerlerimen jaıylymdyq jerlerdiń jetispeıtini jáne sýarý úshin beriletin sýdyń azdyǵy máselelerin talqylady. Murat Baqtııaruly bul másele senatorlardyń baqylaýynda ekenin atap ótti. Ol osy taqyryp boıynsha ótken aıda ǵana depýtattyq saýal joldap, Syrdarııa ózenindegi sý deńgeıiniń kúrt tómendeýine baılanysty Úkimetten qajetti sharalar qabyldaýdy suraǵan bolatyn.
Senatorlar ortalyq aýdandyq aýrýhananyń jumysymen de tanysty. Onda medıtsınalyq mekemeni jańa apparattarmen jáne dárilik zattarmen qamtamasyz etý, telemedıtsınany tıimdi paıdalaný jáne odan ári damytý, sondaı-aq sanavıatsııa máseleleri kóterildi.
Senatorlar Jalaǵash aýdanynda bolǵan kezde agrarshylarmen jáne dárigerlermen kezdesti. Aýdandaǵy sharýa qojalyqtarynyń basshylarymen kezdesýde kóktemgi egis naýqanyna tyńaıtqyshtar men sýbsıdııalardy ýaqytyly jetkizý máseleleri talqylandy. Senatorlar jańadan salynǵan aýdandyq aýrýhanaǵa baryp, medıtsına qyzmetkerleri men naýqastarmen de kezdesti.
Depýtattar Syrdarııa aýdany Shirkeıli aýyldyq okrýginde ornalasqan feldsherlik-akýsherlik pýnkttiń apatty jaǵdaıyna alańdaýshylyq bildirip, dárigerlik pýnkt jáne medıtsınalyq qyzmet kórsetý júıesi qyzmetiniń problemalyq máselelerine nazar aýdardy.
Senatorlar osy kezdesýler barysynda aýyl turǵyndarymen elimizdiń Prezıdenti Qasym-Jomart Toqaevtyń Qazaqstan halqyna Joldaýynda aıtylǵan jańa saıası reformalardy talqylady. Sondaı-aq ótken kezdesýlerdiń qorytyndysy boıynsha óńir turǵyndary aıtqan barlyq problemalyq máseleler depýtattardyń muqııat zerdelenetini jáne Úkimet músheleriniń aldynda qoıylatynyn aıtty.
