Qyzylorda oblysy «Altyn dán» merekesin atap ótýde
Jyldaǵy dástúr boıynsha mereke aıasynda aýylsharýashylyǵy ónimderiniń jármeńkesi uıymdastyrylyp, Qyzylorda qalasy men barlyq aýdandardan arnaıy kelgen sharýashylyqtar óz ónimderin turǵyndarǵa arzan baǵamen usyndy. Óńir basshysy Qýanyshbek Ysqaqov jármeńkeni aralap kórip, turǵyndarmen suhbattasty.
Qyzylorda oblysynyń sharýalary jármeńkege 1 700 tonnaǵa jýyq aýyl sharýashylyǵy ónimderin – kókónis, baqsha jáne sút ónimderi men balyq, et alyp kelgen. Aıta keteıik, barlyq ónim naryqtaǵy baǵadan 10-15 paıyzǵa tómen satyldy. Sonymen qatar, jármeńke alańdarynda ónerpazdar óz ónerlerin kórsetip, qala turǵyndaryna kóterińki kóńil-kúı syılady.
Munan soń, «Altyn dán» merekesine arnalǵan saltanatty jıyn uıymdastyrylyp, óńir basshysy aýylsharýashylyǵy salasynyń úzdikterin marapattady.
«Qazirgi tańda oblystyń agrarlyq sektorynda serpindi damý dınamıkasy qalyptasyp keledi. Keıingi jyldary agrarlyq sektorda óndirilgen ónim kólemi 1,5 esege ósti. Aýyl sharýashylyǵyna salynǵan ınvestıtsııa kólemi 46 esege, tamaq ónimderin óndirýge salynǵan ınvestıtsııa 10 paıyzǵa ulǵaıdy. Bıyl oblys boıynsha barlyǵy 183,1 myń gektarǵa aýyl sharýashylyǵy daqyldary ornalastyrylyp, jalpy egis kólemi 2014 jylmen salystyrǵanda 25 myń gektarǵa artty. Ártaraptandyrý baǵytynda mal azyqtyq daqyldar 8 myń gektarǵa, maıly daqyldar 7 myń gektarǵa, al, kúrishten basqa dándi daqyldar kólemi 3,7 myń gektarǵa ulǵaıdy. Sondaı-aq, bıyldan bastap oblysta alǵash ret 3 sharýashylyqta soıa 50 gektarǵa egilip, jaqsy nátıje kórsetti. Aldaǵy jyly soıany 500 gektarǵa jetkizýdi josparlap otyrmyz», - dedi oblys ákimi.
«Úzdik aýdan» nomınatsııasyn bıyl Jalaǵash aýdany jeńip aldy. Egin sharýashylyǵy salasynda jetistikke jetip, «Ozat aýdan» nomınatsııasy boıynsha Shıeli aýdany, al mal sharýashylyǵynda Jańaqorǵan aýdany ozat atandy. Sonymen qatar, aýyl sharýashylyǵy ónimderin óńdeýde jetken jetistikteri úshin Qyzylorda qalasynyń ákimi Nurlybek Nálibaev marapattaldy. Munan bólek aımaq basshysy sala eńbekkerlerine Aýyl sharýashylyǵy salasynyń úzdigi jáne Y. Jaqaev atyndaǵy tósbelgilerin tapsyrdy.
«Altyn dán-2019» sharasynda «Maǵjan ı K» JShS óziniń úzdik qyzmetkerlerine 7 avtokóliktiń kiltin, sonymen qatar, «Dostyq-jer» JShS 6 avtokóliktiń kiltin tabystady. Al, «Jan-Araı jem» JShS úzdik dep tapqan qyzmetkerlerine 1 mln teńge jáne 500 myń teńgeniń eki sertıfıkatyn tapsyrdy.
Memleket basshysynyń tapsyrmasyn júzege asyrýda qabyldanǵan Agrokarta sheńberinde aýylsharýashylyq ónimderi túrlerin jáne eksport kólemin ulǵaıtyp ishki naryqtyń suranysyn qamtamasyz etý boıynsha jumystar júrgizilýde. Máselen, Syr óńiriniń kúrishi Mońǵolııa, Túrkııa, Aýǵanstanǵa eksporttalyp, sondaı-aq, Iran naryǵyna shyǵarý da josparlanýda. Ózbekstan, Iran jáne Birikken Arab Ámirlikterine sıyr jáne qoı, eshki eksporttalsa, kókónister pen baqsha ónimderi - Qytaı men Reseıge t.b. elderge jiberiledi.
Agrokarta aıasynda cońǵy 5 jylda oblystyń jalpy óńirlik ónimdegi aýyl sharýashylyǵynyń úlesi 2,6 paıyzdan 3,7 paıyzǵa artqan. Sonymen qatar, bıyldan bastap jalpy quny 2 mlrd teńgeden asatyn 20 ınvestıtsııalyq joba iske asyrylýda.
Bıyl oblysta ǵylymı negizdelgen jańa tehnologııalar men ınnovatsııalyq jobalardy óndiriske engizý arqyly AÓK qarqyndy damytý boıynsha 9 ınnovatsııalyq joba qolǵa alynyp, joǵary ári sapaly ónim beretin kúrish, kartop, asqabaq, soıa, qant qumaıynyń sorttary óndiriske engizildi.
Syr dıqandary egin jınaý jumystaryn aıaqtap, 87,9 myń gektar kúrishtiń ár gektarynan 60,3 tsentnerden ónim jınap, el qambasyna 530,5 myń tonna kúrish quıdy. Elimiz táýelsizdik alǵaly kúrishshiler jeti jyl qatarynan osyndaı joǵary jetistikke qol jetkizip keledi. 2019 jyly egilgen egis kólemine tolyǵymen joǵary reprodýktsııaly tuqym paıdalanylǵan. Sonymen qatar, aýyl sharýashylyq qurylymdary óz qarjysy esebinen jáne «QazAgroQarjy» AQ arqyly 6,4 mlrd teńgege barlyǵy 229 dana túrli aýyl sharýashylyǵy tehnıkasy satyp alǵan.
Qyzylorda qalasynyń 201 jyldyǵy men «Altyn dán» merekesi qatar toılanyp, saltanatty shara «Báıgemen» jalǵasty.
