Qyzylorda oblysy ákiminiń 98 grant ıegeri anyqtaldy
Bıyl oblys ákimi mektep bitirýshi túlekterdiń joǵary oqý ornynan bilim alýy úshin 100 grant taǵaıyndaǵan bolatyn. Qyzylorda qalasy men aýdandarda qurylǵan arnaıy komıssııa ótinish bergen 138 úmitkerdiń qujattaryn qarap shyqty. Nátıjesinde barlyǵy 98 grant ıegeri anyqtaldy.
«Ákimdik janynan qurylǵan arnaıy komıssııanyń sheshimimen oblys ákiminiń granty elimizdegi úzdik 4 joǵarǵy oqý ornyna bólindi. Qorqyt ata atyndaǵy Qyzylorda ýnıversıtetine – 67, «Nur-Múbarak» ýnıversıtetine – 6, M.Ospanov atyndaǵy Batys Qazaqstan memlekettik medıtsına ýnıversıtetine – 11, S.J. Asfendııarov atyndaǵy Qazaq Ulttyq medıtsına ýnıversıtetine – 16 túlek tegin bilim alýyna múmkindik aldy. Ákim grantyn ıelengenderdiń 57-i kópbalaly, 18-i turmysy tómen, 11-i asyraýshysynan aıyrylǵan otbasynan, 9-y ata-anasynyń bireýi múgedek, 1-ýi «Atameken» balalar úıiniń tárbıelenýshisi, 2-ýi múgedek bala», - dedi oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Meırambek Ábdýkarımov.
Taǵaıyndalǵan granttar boıynsha bilim berý salasynyń matematıka, orys tili men ádebıeti, qazaq tili men ádebıeti, shet tili, bıologııa, dene shynyqtyrý jáne sport, bastaýyshta oqytý pedagogıkasy men ádistemesi mamandyqtaryna – 38, óner salasy boıynsha dástúrli mýzyka óneri, horeografııa mamandyǵyna – 7 grant belgilengen. Sondaı-aq, bilim alýshy jastar aqparattyq qaýipsizdik júıesine – 2, azyq túlik ónimderin óndirý tehnologııasyna – 1, ınjenerlik jeliler men júıelerge – 5, sý resýrstary jáne sýdy paıdalanýǵa – 1 grant ıegeri atandy. Oǵan qosa kadastr jáne jerge ornalastyrýǵa – 1, jýrnalıstıka jáne reporter isine – 10, dintanýshy mamandyǵyna – 6, medıtsına salasy boıynsha jalpy medıtsınaǵa – 27 grant taǵaıyndaldy.
Eske salsaq, Qyzylorda oblysynda kúrishke oraq tústi.