Qyzylorda oblysy agroónerkásipte zamanaýı sý únemdeý tehnologııalary qoldanylmaq
Syr óńirinde bıyl mamyr-maýsym aılarynda aýa temperatýrasynyń salqyn boldy. Sondaı-aq, shilde aıynda Syrdarııa ózenindegi sýdyń aıtarlyqtaı azaıdy. Sonyń saldarynan sý tapshylyǵy oryn aldy. Osyndaı jaǵdaılarǵa qaramastan óńirdegi sharýalar sol synaqtan abyroımen ótti. Búginde olar egin jınaýǵa kirisip otyr.
«Qazirgi jaǵdaıdaǵy sý tapshylyǵy jaǵdaıynan sabaq alyp, keleshekte aǵymdaǵy jaǵdaıdy eskere otyryp, sharýashylyqtyń odan ári damýy úshin barlyq sharalardy jasaýymyz kerek. Sý tapshylyǵynyń keri áserin azaıtýdyń biz úshin birden-bir joly - «Kúmisketken» sý qoımasy men Qaraózek arnasyndaǵy toǵannyń qurylysyn bastaýdy jedeldetý», - dedi oblys ákimi Qyrymbek Kósherbaev Qarmaqshy aýdanyndaǵy «Jańajol» JShS egis alqabynda ótken astyq jınaý rásimi men aýylsharýashylyǵyn damytý boıynsha semınar-keńesinde.
Atalmysh sý qoımasyn salý úshin tehnıkalyq-ekonomıkalyq negizdemesi men jobalyq-smetalyq qujattamasyn ázirleýge oblystyq bıýdjetten qarajat bólingenin atap ótken jón. «Kúmisketken» sý qoımasy 600 mln tekshe metr sýdy, al Qaraózektegi toǵan 1,5 mıllıard tekshe metrge deıin sý jınaýǵa múmkindik beredi.
Mamandar Syr óńirinde sýarmaly sýdy únemdeý jáne tıimdi paıdalaný boıynsha tolyq sharalar keshenin engizý qajet ekenin aıtady. Máselen, zamanaýı sý únemdeý tehnologııalaryn qoldaný - mańyzdy máselelerdiń biri.
«Elbasymyzdyń aldaǵy 5 jyl ishinde agroónerkásip keshenindegi eńbek ónimdiligin jáne óńdelgen aýyl sharýashylyǵy óniminiń eksportyn kem degende 2,5 esege arttyrý tapsyrmasyn oryndaý úshin egin sharýashylyǵynda sýdy az qajet etetin, ekonomıkalyq jaǵynan tıimdiligi joǵary, syrtqy naryqta suranysy mol daqyldardy jáne tsıfrlyq agrotehnologııalardy engizý qazirgi jaǵdaıda óte mańyzdy. Bul baǵyttaǵy jumystardy óz dárejesinde atqarý úshin biz oblystyń agrarlyq salasyn 2020 jylǵa deıin damytý Agrokartasyn júzege asyrý is-sharalar josparyn bekitip, agrarlyq ǵylymnyń ozyq jetistikterin keńinen paıdalanýdy bastadyq», - dedi aımaq basshysy.