Qyzylorda oblysy 20 memleketke aýylsharýashylyq ónimin eksporttap otyr
«Qazirgi kezde azyq-túlik baǵasyn turaqtandyrý maqsatynda ár aýyldyń múmkindigine qaraı kókónis jáne baqsha ónimderin ózimizde óndirý úshin bos jatqan jerlerdi ıkemdep, egin egýge yntaly azamattarǵa bólip berýimiz qajet», - dedi aımaqtyń kúretamyry bolyp tabylatyn salaǵa qatysty óńir basshysy Nurlybek Nálibaev oblys máslıhatynyń sessııasynda.
Bıyl oblys kóleminde barlyǵy 188,6 myń gektarǵa egis egildi. Onyń ishinde negizgi daqyl – kúrish kólemi 78,6 myń ga.
Bıylǵy jyly egis kólemin ártaraptandyrý baǵytynda qosymsha soıa daqylynyń egis kólemi 189 gektarǵa, qant qumaıy 358 gektarǵa jetti.
Sonymen qatar sý únemdeý tehnologııasyn qoldaný arqyly bıylǵy jyly barlyǵy 607 gektar jerge aýyl sharýashylyǵy daqyldary egiledi.
Búgingi kúni egin jınaý jumystary bastalyp, oblys boıynsha egilgen 5593 ga kúzdik bıdaıdan – 9306 tonna, 5813 gektar jazdyq bıdaıdan – 3289 tonna, 375 gektar arpadan 145 tonna ónim jınaldy. Dándi daqyldardy jınaý áli de jalǵasýda.
Al mal sharýashylyǵy salasynda oń dınamıka qalyptasyp, mal basy turaqty ósip, óndirilgen ónim kólemi artýda.
2022 jyldyń 1 shildesindegi málimetke sáıkes, Qyzylorda oblysynda 420,3 myń bas múıizdi iri qara, 895,7 myń bas qoı men eshki, 210,9 myń bas jylqy, 61,6 myń bas túıe jáne 128,0 myń bas qus tirkelgen.
Mal basyn byltyrǵy jyldyń espti kezeńimen salystyrǵanda MІQ-8,6%, qoı men eshki-5,7%, jylqy 17,1%, túıe 7,1%, qus 2,7% kóbeıgen.
Esepti kezeńde 17,7 myń tonna et, 41,6 myń tonna sút jáne 3,3 mln dana jumyrtqa óndirilip, 2021 jyldyń sáıkesti kezeńimen salystyrǵanda et óndirisi 1,8%, sút óndirisi 1,7%, jumyrtqa óndirisi 3,1% artty.
Jalpy 2022 jyldyń 1 maýsymyna oblystan 19,8 mln dollardy quraıtyn 39,8 myń tonna aýyl sharýashylyǵy ónimderi (kúrish, balyq ónimderi, bıdaı qaldyǵy, qamys) eksporttalyp, ótken jyldyń sáıkesti kezeńimen salystyrǵanda 125,9 paıyzdy qurap otyr. Ónimder álemniń 20 memleketine eksporttaldy.
Jalpy bıyl eginshilik salasyna 4,3 mlrd teńge, mal sharýashylyǵyn sýbsıdııalaýǵa 4 mlrdteńge qarjy qaralǵan. Endigi kezekte mal ónimderin óndirýmen birge ony tereń óńdeýge mán beriletin bolady.
Sonymen qatar bıyl oblys boıynsha jalpy quny 10,3 mlrd teńgeni quraıtyn 14 ınvestıtsııalyq jobany iske asyrý josparlanýda. Nátıjesinde bul salada 271 jańa jumys orny qurylatyn bolady.
