Qyzylorda oblystyq máslıhatynyń kezekti sessııasy mal sharýashylyǵy máselesine nazar aýdardy
QYZYLORDA. 31 naýryz. QazAqparat /Jańagúl Serdaly/ - Qyzylorda oblystyq máslıhatynyń úshinshi sessııasy bolyp ótti. Ol negizinen mal sharýashylyǵyn órkendetý máselesine arnaldy.
Sessııada oblys ákiminiń orynbasary Baqyt Jahanov «Agrarlyq salany damytý men qoldaý sharalary týraly» baıandama jasady. Ol óz sózinde saladaǵy oń ózgerister jaıyna toqtaldy. Atap aıtqanda, mal sharýashylyǵyn órkendetýge sońǵy jyldary aıryqsha kóńil bólinip keledi. Mal tuqymyn asyldandyrý baǵytynda aıtarlyqtaı nátıjeli jumystar atqarylýda. Osy rette mal ónimderin molaıtýǵa baǵyttalǵan «Sybaǵa» baǵdarlamasyn júzege asyrýǵa erekshe mán berilip otyr. Oblysta osy baǵdarlamany júzege asyrýǵa qatysýǵa 124 fermerlik sharýashylyq yqylas bildirdi. Olardyń 29-y «KazAgro» júıesi boıynsha nesıelik resýrstar aldy. Osy qarjyǵa 1600 bas iri qara maly satyp ákelindi. Bul aımaqta sút baǵytynda da, et baǵytynda da jandy jumystardyń qolǵa alynǵanyn baıqatady. Qyzylorda qalasynda «Qyzylorda» saýda-logıstıkalyq ortalyǵy jumys isteıdi. Onyń ózindiń ınfraqurylymy qalyptasqan. Ortalyqtyń kúshimen ótken jyly aımaqta úlken azyq-túlik qoımasy salyndy. Ol bıyl 3250 tonna azyq-túlik saqtaı alady. Bulardan bólek oblysta jylyjaı júıesin damytýǵa qatty kóńil bólinýde. Osynyń arqasynda byltyr 24 jylyjaı paıdalanýǵa berildi, al qazir Qyzylordada taǵy 50, Aral aýdanynda 4 jylyjaı salynyp jatyr. Balyq sharýashylyǵyn damytý maqsatynda da aıtarlyqtaı pármendi jumystar qolǵa alyndy. Bıylǵy jyly balyq ónerkásibin qalpyna keltirý baǵdarlamasy aıasynda oblystyq bıýdjetten qomaqty qarjy bólinip, kólder júıesin retteý máselesi júzege asyrylmaqshy. Balyqty óńdeý salasyndaǵy jumystar birtindep qalyptasyp keledi. Ótken jyly Indýstrııalandyrý kartasy negizinde qolǵa alynǵan balyq óńdeý tsehtarynyń qýattylyǵyn arttyrý jumystary taǵy jalǵasyn tabady.
Sessııada jergilikti ónimderdiń básekege qabiletin arttyrý maqsatynda veterınarlyq-aldyn alý sharalaryn jaqsartýǵa da mán berile bastalǵany aıtyldy. Oblysta birinshi ret qazirgi zamanǵy enzotehnıkalyq sharalar ótkizýge arnaıy qarjy qarastyryldy. Mal sharýashylyǵynyń jemshóp qoryn ulǵaıtýǵa baılanysty jumystar qarqyndy júrip jatyr. Byltyr Qyzylordada táýligine 80 tonna ónim beretin qurama jem shyǵarý zaýyty iske qosyldy. Sondaı-aq Syrdarııa aýdanynda arnaıy tuqym sharýashylyǵy quryldy. Ol jońyshqa tuqymyn óndirýmen aınalysady. Baıandamashy sonymen qatar jerdi tıimdi paıdalanbaýshylyq, topyraqtyń tuzdanýy sekildi máseleler boıynsha da jumystar júrgizilip jatqanyn aıtty.
Sessııada budan da basqa máseleler talqylandy.
