Qyzylorda oblystyq fılarmonııasyna kompozıtor Keńes Dúısekeevtiń esimi beriledi
Oblystyq máslıhat sessııasynda QR Úkimetiniń janyndaǵy respýblıkalyq onomastıka komıssııasynyń qaraýyna Qyzylorda oblysynyń bilim berý jáne mádenıet uıymdaryna ataý berý jónindegi usynystar qaraldy.
Oblystyq qoǵamdyq damý basqarmasynyń basshysy Mıra Qazbekova máslıhat depýtattaryna osy kúnge deıin óńirlik onomastıka komıssııasynyń otyrystarynda qoldaý tapqan tıisti basqarmalardyń usynysyn jetkizdi. Atap aıtqanda, Qyzylorda oblystyq fılarmonııasyna kompozıtor Keńes Dúısekeevtiń esimin berýge qoldaý bildirildi. Atalǵan bastama aldaǵy ýaqytta respýblıkalyq onomastıka komıssııasy qaraýyna usynylady.
Keńes Dúısekeev - Qazaqstannyń eńbek sińirgen óner qaıratkeri. Óner jolynda 200-den astam shyǵarma jazdy. Onyń ishinde «Tolǵaý» sımfonııasy, «Jalańtós batyr» sımfonııa poema-kartınasy, «O, dúnıe» kantatasynyń, «Jyl mezgilderi» romanstar tsıkliniń avtory boldy.
«Gúlder» ansambliniń, «Qazaqkontsert» gastroldik-kontsert birlestiginiń mýzyka jetekshisi, kórkemdik jetekshisi, «Qazaq teledıdary» mýzyka redaktsııasynyń bas redaktory, Qazaqstan memlekettik teleradıo komıteti estradalyq-sımfonııa orkestriniń kórkemdik jetekshisi jáne bas dırıjeri qyzmetterin atqardy.
Foto: astana-akshamy.kz
