Qyzylorda oblystyq Ekonomıkalyq tergeý departamenti basshysynyń orynbasary ustaldy

NUR-SULTAN. QazAqparat - Qyzylorda oblystyq Ekonomıkalyq tergeý departamenti basshysynyń orynbasary jemqorlyq qylmys jasady degen kúdikpen ustaldy.

Bul týraly QR Sybaılas jemqorlyqqa qarsy is-qımyl agentiginen málim etti, dep habarlaıdy QazAqparat tilshisi.

«Almaty qalalyq sybaılas jemqorlyqqa qarsy qyzmeti jemqorlyq qylmysyn jasady degen kúdikpen Qyzylorda oblystyq ekonomıkalyq tergeý departamenti basshysynyń orynbasary men onyń senimdi ókilin ustady. Olar topty adammen aldyn ala sóz baılasyp, aldaý arqyly Almaty qalasy kásipkeriniń 10 mln teńge somasyndaǵy aqshalaı qarajatyn bank shottaryn buǵattan bosatamyn degen jeleýmen alyp ketken», - delingen habarlamada.

Vedomstvo málimetinshe, kúdiktiler kásipkerden 10 mln teńge somasynda aqshalaı qarajat alǵan kezde ustaldy.