Qyzylorda men Jambyl oblysyndaǵy naýqastardan koronavırýs anyqtalǵan joq - Bekshın

NUR-SULTAN. QazAqparat - Qazaqstannyń bas sanıtar dárigeri Jandarbek Bekshın Qyzylorda men Jambyl oblystaryndaǵy naýqastardyń jaı-kúıi týraly aıtyp berdi, dep habarlaıdy QazAqparat tilshisi.

«Qyzylordada naýqas dene qyzýymen jáne bas aýrymen aýrýhanaǵa tústi. Suraý barysynda anyqtalǵandaı, syrqat jýynǵan soń vagonda ashyq tereze astynda uıyqtap qalǵan. Ol taıaýda Qytaıdyń Haınan aralynan oralǵandyqtan bólek boksqa oqshaýlandyryldy. Qazirgi ýaqytta patsıent júrek-qantamyr júıesi aýrýlaryna shaǵymdanbaıdy, qyzýy joq, barlyq qajetti dıagnostıka júrgizilýde», - dedi J. Bekshın Ortalyq kommýnıkatsııalar qyzmetinde ótken brıfıngte.

Jambyl oblysynda eki naýqasqa JRVI dıagnozy qoıyldy. Jaǵdaılary qanaǵattanarlyq, temperatýra qalypty.

Almaty oblysyndaǵy azamattardyń jaǵdaıy da qalypty. Olar Panfılov aýdandyq aýrýhanasynda tekserýden ótti. Qazir olardy shyǵarý máselesi sheshilýde.